Birlashgan Millatlar Tashkiloti bosh kotibi Antoniu Guterrish “Tolibon” vakillari bilan shaxsan gaplashishga tayyor. Bu haqda Guterrish matbuot anjumanida aytib o‘tdi.
“Men (“Tolibon” bilan) shaxsan gaplashishga tayyorman. Aynan kim bilan qaysi masalada gaplashishim mumkinligi aniq bo‘lsa bas. Bir kun oldin Qatar bosh vaziri o‘rinbosari va tashqi ishlar vaziri bilan yaqin muloqotda bo‘ldim. Biz Qatarning tashabbusini kuzatamiz va qo‘llab-quvvatlaymiz. Umid qilamanki, Afg‘onistonda biror-bir inklyuziv hukumat tuzish mumkin bo‘ladi”, — dedi Guterrish.
BMTning Afg‘onistondagi gumanitar masalalar bo‘yicha koordinatori Ramiz Alakbarovning ma’lum qilishicha, “Tolibon” BMTdan mamlakatda qolishni va insonparvarlik faoliyatini davom ettirishni so‘ragan. Alakbarovning ta’kidlashicha, tashkilot “Tolibon” bilan aniq kelishuvga ega emas.
Uning so‘zlariga ko‘ra, BMT gumanitar idorasi va “Tolibon” o‘rtasidagi amaliy o‘zaro munosabatlar 18 yildan beri davom etmoqda. “Bizda ishchi aloqalar mavjud. Ular bizni qo‘llab-quvvatlashiga har doim ishontirib keladi. Ular buni yana bir bor bildirdi hamda bizdan bu yerda qolishimizni va gumanitar yordam ko‘rsatishda davom etishimizni so‘radi”, — deydi BMT vakili.
Uning qo‘shimcha qilishicha, BMTning jangarilar bilan o‘zaro munosabatlariga “tabiiyki, ba’zi aniqliklar kiritiladi, tafsilotlar ishlab chiqiladi”. Xususan, tashkilot gumanitar sharoitda ishlaydigan ayollarning ish joyida qolishi masalasini ishlab chiqmoqchi, dedi Ramiz Alakbarov.
Xalqaro valyuta jamg‘armasi (XVJ) Afg‘onistonga yordam berishni to‘xtatgan edi. Bunga respublikani egallab olgan “Tolibon” hokimiyatining tan olinish-olinmasligi muammosi sabab bo‘lmoqda.
Shuningdek, AQSh Afg‘onistonning Amerika banklaridagi davlat zaxiralarini muzlatib qo‘ygan. XVJ ma’lumotlariga ko‘ra, 2021-yil aprel oyi holatida Afg‘oniston hukumati zaxiralari 9,4 milliard dollar bo‘lgan, bu mamlakat yillik yalpi ichki mahsulotining uchdan bir qismini tashkil qiladi. Bu mablag‘lar, asosan, AQShda saqlanadi, Amerika banklaridagi mablag‘larning aniq miqdori noma’lum, ammo Washington Post ma’lumotlariga ko‘ra, bu milliardlab dollarni tashkil qiladi.
Izoh (0)