2021-yil yakuniga qadar to‘liq xususiy investitsiyalar hisobiga 8 ta issiqlik va quyosh elektr stansiyalari ishga tushiriladi. Bu haqda Prezident Shavkat Mirziyoyev qayd etdi, deya xabar bermoqda “Daryo” muxbiri.
“Biznes uchun zarur bo‘lgan infratuzilma muammolarini 3 mingga yaqin tadbirkorlar ko‘targan.
Shuning uchun kelgusi yil 1-yanvardan boshlab qiymati 200 milliard so‘mga teng loyihalar bo‘yicha elektr, tabiiy gaz, suv tarmoqlari va yo‘l infratuzilmasini yetkazib berish to‘liq davlatning zimmasida bo‘ladi. Bu imtiyoz hozirgi kungacha faqatgina 50 million dollardan oshadigan xorijiy investorlar loyihalariga qo‘llanib kelinmoqda.
Elektr energiyasidagi uzilishlar ko‘pchilik tadbirkorlarimizni bezovta qilayotgani ham ayni haqiqat. Bu masala bo‘yicha har bir tuman, shahar va mahalla kesimida alohida dasturlar amalga oshirilmoqda.
2021-yil 1-noyabrgacha 4 mingta transformatorni almashtirish, 35 ta podstansiya, 15 ming kilometr tarmoqlarni yangilash ishlari yakuniga yetkaziladi. Bu ishlarni amalga oshirish uchun joriy yilning o‘zida ilk bor 3 trillion so‘m mablag‘ ajratganmiz. Oldingi yillarda bu ishlarning 10 foizi ham bo‘lmagan.
Agar tahlil qilib ko‘rsak, so‘nggi 5 yilda elektr energiyasi iste’molchisi bo‘lgan tadbirkorlar soni 25 foizga, ularning iste’mol hajmi 30 foizga oshgan.
Shu bois elektr energiyasi ishlab chiqarish hajmini keskin oshirish maqsadida tariximizda ilk bora bu sohaga to‘g‘ridan to‘g‘ri xorijiy va xususiy biznes kirib keldi.
Natijada, shu yil yakuniga qadar to‘liq xususiy investitsiyalar hisobiga, umumiy quvvati 1 ming 800 megavatt bo‘lgan 8 ta issiqlik va quyosh elektr stansiyalari ishga tushiriladi. Energetika vazirligi kelgusi yillarda bu kabi loyihalarni keskin ko‘paytirib, 2023-yilga qadar elektr energiyasi bo‘yicha qo‘shimcha ishlab chiqarish quvvatlarini 4 ming 400 megavattga oshirishi shart”, — dedi davlat rahbari.
Eslatib o‘tamiz, ayni paytda Toshkent shahridagi O‘zbekiston xalqaro anjumanlar saroyida Shavkat Mirziyoyevning tadbirkorlar bilan ochiq muloqoti bo‘lib o‘tmoqda. Ushbu tadbirda davlat rahbari soliq idoralari qo‘llayotgan ayrim jarimalar sonidan xavotirda ekanligi, inflyatsiya darajasini kelgusi ikki yilda 5 foizga tushirish reja qilingani, O‘zbekistonda tadbirkorlarga kreditni milliy valyuta — so‘mda berish tizimi yo‘lga qo‘yilishini ma’lum qildi.
Shuningdek, tashabbus ko‘rsata olmaydigan, yangi-yangi g‘oyalarni ko‘tarib chiqishga, o‘zgarish qilishga intilishi bo‘lmagan rahbarlarga nisbatan juda qattiq talab va choralar bo‘lishini aytdi.
Tadbir oldidan mamlakatda ishbilarmonlik muhitini rivojlantirishga munosib hissa qo‘shib kelayotgan tadbirkorlarning bir guruhiga davlat rahbari nomidan minnatdorchilik xatlari topshirildi.
Izoh (0)