Ish haqining oshirilishi O‘zbekiston budjetiga qanchaga tushishi ma’lum qilindi

O‘zbekistonda ish haqi, pensiyalar, stipendiyalar va nafaqalar miqdorining oshirilishi 2021-yilining sentabrdan dekabr oyiga qadar davlat budjetidan 2,6 trillion so‘m sarflanadi. Bu haqda Moliya vazirligi Davlat budjeti departamenti bo‘lib boshlig‘i Baxtiyor Ortiqov “Daryo”ga ma’lum qildi.

Prezident Shavkat Mirziyoyevning farmoni bilan 2021 yilning 1-sentabrdan boshlab budjet tashkilotlari xodimlarining ish haqi, pensiya, stipendiya va nafaqalar miqdori 1,1 barobarga oshirilishi belgilandi.

Baxtiyor Ortiqovning aytishicha, O‘zbekiston Respublikasining “2021-yil uchun O‘zbekiston Respublikasining davlat budjeti to‘g‘risida” qonuniga budjetnoma tayyorlanayotgan davrda oylik ish haqini inflyatsiya darajasida oshirish nazarda tutilgan.

“Ish haqi, pensiyalar, stipendiyalar va nafaqalar miqdorini oshirishi evaziga 2021-yil yakuniga qadar davlat budjetidan 2,6 trillion so‘m xarajatlarni amalga oshirishga to‘g‘ri keladi. Ushbu mablag‘lar hozirgi kunda davlat budjetda mavjud. Respublika bo‘yicha budjet tashkilotlarida jami 1,850 million nafardan ortiq xodim xizmat qiladi. Avval ularning o‘rtacha oylik maoshi 2 million 539 ming so‘mga to‘g‘ri kelgan bo‘lsa, ish haqining oshirilishi hisobiga 2 million 793 ming so‘mga ko‘tarildi”, – dedi Moliya vazirligi vakili.

Ta’kidlanishicha, budjetdan moliyalashtiriladigan sohalar ichida eng yiriklari xalq ta’limi va sog‘liqni saqlash tizimi hisoblanadi. Farmonga ko‘ra, umumiy o‘rta ta’lim maktablari o‘qituvchilarining o‘rtacha oylik ish haqi 2 million 53 ming so‘mdan 2 million 258 ming so‘mga yetkaziladi. Shuningdek, shifokorlarning o‘rtacha maoshi 2 million 987 ming so‘mdan 3 million 286 ming so‘m yetib belgilangan.

“Pandemiya sharoitida oylik maoshlarning oshirilishi aholini to‘lov qobiliyatini yaxshilashga xizmat qiladi. Buni aholini pandemiya vaqtida yuzaga kelgan turli iqtisodiy muammolardan tezroq chiqib ketishining asosiy tadbirlardan biri sifatida ko‘rishimiz mumkin”, – deya qo‘shimcha qildi Ortiqov.

Ma’lumot uchun, farmonga ko‘ra:

• mehnatga haq to‘lashning eng kam miqdori – oyiga 822 000 so‘m;

• bazaviy hisoblash miqdori – oyiga 270 000 so‘m;

• pensiyani hisoblashning bazaviy miqdori – oyiga 289 000 so‘m;

• yoshga doir eng kam pensiyalar – oyiga 565 000 so‘m;

• bolalikdan nogironligi bo‘lgan shaxslarga beriladigan nafaqa – oyiga 622 000 so‘m;

• zarur ish stajiga ega bo‘lmagan keksa yoshdagi va mehnatga layoqatsiz fuqarolarga beriladigan nafaqa – oyiga 440 000 so‘m;

• ish staji to‘liq bo‘lmagan chog‘dagi pensiyalarning eng kam miqdori qo‘shimcha to‘lovni hisobga olgan holda – oyiga 440 000 so‘m;

• belgilangan yoshga doir eng kam pensiya miqdoridan 623 000 so‘mgacha, pensiya oluvchilarning yoshga doir va nogironlik bo‘yicha pensiyalari miqdori – oyiga 623 000 so‘m etib belgilandi.

Shuningdek, 1941–1945-yillardagi urush nogironlari va qatnashchilari, shuningdek, fashistlar konslagerlarining voyaga yetmagan sobiq mahbuslari va Leningrad shahri qamal qilingan davrda ishlagan shaxslarning eng kam pensiya miqdori ustamalarni inobatga olgan holda – oyiga 2 750 000 so‘m etib belgilanadi.

Bundan tashqari, boquvchisini yo‘qotganlik pensiyasi oluvchilarning bir nafar mehnatga qobiliyatsiz oila a’zosi uchun pensiyaning eng kam miqdori – oyiga 440 000 so‘m etib belgilanadi va keyingi har bir mehnatga qobiliyatsiz oila a’zosi uchun amaldagi tartibga muvofiq pensiya to‘lanadi.

Bundan avval O‘zbekistonda bolalar nafaqasi va kam ta’minlangan oilalarga moddiy yordam to‘lovlari oshirilishi hamda O‘zbekistondagi vasiylik, homiylik va patronatga olingan bolalarga 18 yoshga to‘lguniga qadar mahalliy budjetdan 1,2 mln so‘mdan to‘lanishi haqida xabar berilgandi.