Toshkent viloyatning Zangiota tumanida ekstremistik faoliyat bilan shug‘ullanib kelayotgan yana bir guruh ushlandi. Bu haqda viloyat IIBB matbuot xizmati xabar berdi.
Avvalroq viloyat hududida jinoyatchilikni jilovlash va fuqarolar xavfsizligini ta’minlashga qaratilgan “Xavfsiz hudud” keng qamrovli, tezkor profilaktik tadbirlarining birida Zangiota tumanida bir guruh ekstremistik oqim a’zolari ushlangan haqida xabar berilgan va holat yuzasidan qo‘shimcha surishtiruv ishlari olib borilayotgani ma’lum qilingan.
Aniqlangan ma’lumotlar asosida ushbu tumanida viloyat prokuraturasi, DXX va IIBB xodimlari ishtirokida navbatdagi “Xavfsiz hudud” tezkor tadbiri tashkil etilgan va yashirin ekstremistik faoliyat bilan shug‘ullanayotgan bir guruh shaxslar ushlangan.
Qayd etilishicha, ayni paytda holat yuzasidan tergov harakatlari davom ettirilmoqda. Shuningdek, o‘tkazilgan tadbirlar davomida qidiruv, yonida tig‘li jism olib yurish, belgilangan karantin va pasport-viza qoidalarini buzish, jamoat joyida spirtli ichimlik iste’mol qilish, bezorilik va noqonuniy ov quroli saqlash kabi bir nechta holatlar aniqlanib belgilangan tartibda choralar ko‘rilmoqda.
Bundan avval “Xavfsiz hudud” keng qamrovli profilaktik tadbirlari doirasida Toshkent viloyatining Chinoz tumanida “Jihodchilar” ekstremistik oqimi a’zolarining 10 nafari qo‘lga olingani haqida xabar berilgan edi.
Izoh (0)