Ўзбекистонда иш ҳақи, пенсиялар, стипендиялар ва нафақалар миқдорининг оширилиши 2021 йилининг сентябрдан декабрь ойига қадар давлат бюджетидан 2,6 триллион сўм сарфланади. Бу ҳақда Молия вазирлиги Давлат бюджети департаменти бўлиб бошлиғи Бахтиёр Ортиқов «Дарё»га маълум қилди.
Президент Шавкат Мирзиёевнинг фармони билан 2021 йилнинг 1 сентябрдан бошлаб бюджет ташкилотлари ходимларининг иш ҳақи, пенсия, стипендия ва нафақалар миқдори 1,1 баробарга оширилиши белгиланди.
Бахтиёр Ортиқовнинг айтишича, Ўзбекистон Республикасининг «2021 йил учун Ўзбекистон Республикасининг давлат бюджети тўғрисида» қонунига бюджетнома тайёрланаётган даврда ойлик иш ҳақини инфляция даражасида ошириш назарда тутилган.
«Иш ҳақи, пенсиялар, стипендиялар ва нафақалар миқдорини ошириши эвазига 2021 йил якунига қадар давлат бюджетидан 2,6 триллион сўм харажатларни амалга оширишга тўғри келади. Ушбу маблағлар ҳозирги кунда давлат бюджетда мавжуд. Республика бўйича бюджет ташкилотларида жами 1,850 миллион нафардан ортиқ ходим хизмат қилади. Аввал уларнинг ўртача ойлик маоши 2 миллион 539 минг сўмга тўғри келган бўлса, иш ҳақининг оширилиши ҳисобига 2 миллион 793 минг сўмга кўтарилди», – деди Молия вазирлиги вакили.
Таъкидланишича, бюджетдан молиялаштириладиган соҳалар ичида энг йириклари халқ таълими ва соғлиқни сақлаш тизими ҳисобланади. Фармонга кўра, умумий ўрта таълим мактаблари ўқитувчиларининг ўртача ойлик иш ҳақи 2 миллион 53 минг сўмдан 2 миллион 258 минг сўмга етказилади. Шунингдек, шифокорларнинг ўртача маоши 2 миллион 987 минг сўмдан 3 миллион 286 минг сўм етиб белгиланган.
«Пандемия шароитида ойлик маошларнинг оширилиши аҳолини тўлов қобилиятини яхшилашга хизмат қилади. Буни аҳолини пандемия вақтида юзага келган турли иқтисодий муаммолардан тезроқ чиқиб кетишининг асосий тадбирлардан бири сифатида кўришимиз мумкин», – дея қўшимча қилди Ортиқов.
Маълумот учун, фармонга кўра:
- меҳнатга ҳақ тўлашнинг энг кам миқдори – ойига 822 000 сўм;
- базавий ҳисоблаш миқдори – ойига 270 000 сўм;
- пенсияни ҳисоблашнинг базавий миқдори – ойига 289 000 сўм;
- ёшга доир энг кам пенсиялар – ойига 565 000 сўм;
- болаликдан ногиронлиги бўлган шахсларга бериладиган нафақа – ойига 622 000 сўм;
- зарур иш стажига эга бўлмаган кекса ёшдаги ва меҳнатга лаёқатсиз фуқароларга бериладиган нафақа – ойига 440 000 сўм;
- иш стажи тўлиқ бўлмаган чоғдаги пенсияларнинг энг кам миқдори қўшимча тўловни ҳисобга олган ҳолда – ойига 440 000 сўм;
- белгиланган ёшга доир энг кам пенсия миқдоридан 623 000 сўмгача, пенсия олувчиларнинг ёшга доир ва ногиронлик бўйича пенсиялари миқдори – ойига 623 000 сўм этиб белгиланди.
Бундан ташқари, боқувчисини йўқотганлик пенсияси олувчиларнинг бир нафар меҳнатга қобилиятсиз оила аъзоси учун пенсиянинг энг кам миқдори – ойига 440 000 сўм этиб белгиланади ва кейинги ҳар бир меҳнатга қобилиятсиз оила аъзоси учун амалдаги тартибга мувофиқ пенсия тўланади.
Изоҳ (0)