Toshkentdagi Afg‘oniston elchixonasi mamlakat sobiq prezidenti Ashraf G‘ani O‘zbekistonda ekani haqidagi ma’lumotga ega emas. Bu haqda diplomatik missiya vakili “RIA Novosti”ga ma’lum qildi.
Shuningdek, Tojikiston Tashqi ishlar vazirligi Afg‘oniston prezidenti Tojikiston orqali uchinchi mamlakatga uchib ketgani haqidagi xabarlarni rad etdi.
“Janob Muhammad Ashraf G‘ani o‘tirgan samolyot Tojikiston havo hududiga kirmagan va mamlakat hududiga qo‘nmagan. Yana shuni ham ta’kidlash joizki, Tojikiston tomoni Afg‘oniston tomonidan tegishli so‘rov olmagan”, — deyiladi Tojikiston TIV xabarida.
Bundan tashqari, Qozog‘iston Tashqi ishlar vazirligi ham Ashraf G‘anining ushbu mamlakatda emasligini ma’lum qilgan.
Eslatib o‘tamiz, 15-avgust kuni “Tolibon” butun Afg‘oniston uning nazorati ostiga o‘tganini ma’lum qilgach, mamlakat prezidenti Ashraf G‘ani mamlakatdan uchib ketgani xabar berildi. TOLOnews afg‘on telekanalining xabar berishicha, prezidentning yaqin yordamchilari u bilan birga.
Tojikistonning Asia-Plus agentligi Ashraf G‘ani Tojikistonga uchib ketgani, u yerdan nomi ma’lum qilinmagan uchinchi mamlakatga yo‘l olishi haqida xabar berdi. Kabul News xabariga ko‘ra, G‘ani dastlab Tojikistonga, so‘ng u yerdan Ummonga uchib ketgan. Ammo yuqori martabali ummonlik manba G‘anining Ummonga yetib borgani haqidagi xabarlarni rad etgan.
Ayni vaqtda, The New York Times axborotiga ko‘ra, G‘ani rafiqasi va ikki yordamchisi bilan birga O‘zbekistonga yo‘l olgan. Ushbu axborotni G‘anining shaxsiy qo‘riqchisi Al Jazeera telekanaliga ham tasdiqlagan. O‘z navbatida, “Interfaks” manbasining ma’lum qilishicha, Toshkentga Ashraf G‘ani bo‘lgan samolyotni qabul qilish haqida so‘rov kelib tushmagan. “U O‘zbekistonda emas”, — deya ma’lum qilgan agentlik manbasi.
Izoh (0)