“Tolibon” Afg‘onistonni to‘liq egallagani va 20 yillik urush tugaganini e’lon qildi. Ushbu voqealardan so‘ng Oliy Majlis Qonunchilik palatasi spiker o‘rinbosari Odiljon Tojiyev o‘z munosabatini bildirib o‘tdi.
“Bugun tongni hadik-xavotir va qayg‘u bilan kutib oldik. Qo‘shnilarimizdagi notinchlik bizga ham ta’sir ko‘rsatmay qolmaydi, qalb xotirjamligi yo‘qoldi.
‘Urush – urushgacha bo‘lgan siyosatning davomidir’, degan ibora bor. Afg‘onistondagi vaziyat xaos emas, rejalashtirilgan harakatga o‘xshayapti. Kimlar va qanday maqsadlar hal qiluvchi o‘rinda turgani hammaga ma’lum.
Afg‘onistonga tinchlik kerak. Ammo savolning mazmuni shundayki, o‘sha tinchlikni kimlar, qanday ambitsiyaga ega kuchlar o‘rnatishi biz uchun ahamiyatlimi? Ha, shak-shubhasiz muhim ahamiyatga ega. Balki shuning uchun ham voqealarning ehtimoliy rivojlanishini nazarda tutib, yuqori darajadagi betaraflik, urishayotgan tomonlarning biriga yon bosmaslik siyosati olib borildi”, – deydi spiker o‘rinbosari.
Mavzuga doir: Afg‘oniston “Tolibon”ga qanday taslim bo‘ldi?
“Afg‘onistondagi o‘zbek diasporasi uchun sinovli kunlar boshlandi. “Tolibon”ning o‘zagi pushtun qabilasi ekanini nazarda tutsak, shundoq ham Afg‘onistonda juda nozik va qaltis masala hisoblangan ichki etnik munosabatlar yanayam taranglashadi. O‘zbekiston endilikda xorijdagi etnik o‘zbeklar manfaati uchun ham muzokaralarga kirishi ehtimoli yuqori.
Umuman, “Tolibon” mamlakatni shitob bilan egallayotgan ayni daqiqalarda biz uchun muhimi, o‘sha pozitsiyani saqlab qolish. Ya’ni gumanistik ko‘maklar, qochoqlarga yordam ko‘rsatish barobarida xavfsizligimizga zarracha ham raxna tug‘dirmaslik kerak.
Bu borada O‘zbekiston hukumati xalqaro huquq normalariga izchil amal qilishiga qat’iy ishonaman”, – deydi Odiljon Tojiyev.
Mavzuga doir:
15-avgust tongida O‘zbekiston tomoni Afg‘oniston Qurolli Kuchlarining harbiy xizmatchilaridan iborat 84 kishilik guruhni qabul qilgani (ular orasida uch nafar yarador ham bo‘lgan), ular DXX chegara qo‘shinlari tomonidan qo‘lga olinib, O‘zbekiston hududida vaqtincha bo‘lib turishi tashkil etilgani ma’lum bo‘ldi. Shu kuni soat 10:00 holatiga ko‘ra, ushbu ko‘prikdagi vaziyat yumshadi. Afg‘onistonliklarning asosiy qismi ko‘prikni tark etdi. Peshinga yaqin esa Hayraton ko‘prigi atrofidagi vaziyat butunlay barqarorlashdi.
O‘zbekiston rasmiylarining ma’lum qilishicha, Afg‘oniston bilan chegarada barcha xavfsizlik choralari ko‘rilgan.
Izoh (0)