O‘zbekiston musulmonlari idorasi raisi muftiy Usmonxon Alimov 15-avgust kuni vafot etgandi. Checheniston rahbari Ramzan Qodirov uning vafoti munosabati bilan hamdardlik bildirdi.
Qodirov muftiyning o‘limi haqidagi xabarni qayg‘u bilan qabul qilgan. U Shayx Usmonxon Alimov Chechenistonning birinchi prezidenti, Rossiya Qahramoni Ahmad hoji Qodirovning yaqin do‘sti bo‘lganini, ular 1980-yillardan beri tanish ekanini, birgalikda Toshkent islom institutida birga o‘qishganini qayd etgan.
“Men ham Usmonxon Alimov bilan ko‘p marta uchrashganman. Biz nafaqat Grozniyda, balki O‘zbekistonda ham ko‘rishganmiz. Toshkentga safarim chog‘ida u meni juda samimiy kutib oldi, yuqori darajadagi mehmondo‘stlikni ta’minladi, Ahmad hoji bilan o‘qigan yillarini esladi va bu haqda gapirdi. U juda dono, taqvodor va kamtar odam edi”, — deydi u.
Qodirov Usmonxon Alimovni butun musulmon olami tanigani, hurmat qilgani va qadrlaganini ham ta’kidladi.
“U o‘z hayotini Islom dinini o‘rganish va tarqatishga bag‘ishladi, u Qur’on va sunnat haqida bebaho bilim olgan ko‘plab taniqli insonlarni tarbiyaladi. 2006-yildan O‘zbekiston musulmonlari idorasi raisi edi. O‘z maruzalarida shayx doim yaxshilikka chaqirib, haromdan qaytargan.
Shu kunlarda qardosh O‘zbekiston xalqi bilan qalban birgamiz. O‘zbekistonning hurmatli Prezidenti Shavkat Mirziyoyevga, Shayx Usmonxon Alimovning oilasi va yaqinlariga samimiy hamdardlik bildiraman! Alloh taolo birodarimizni rahmatiga olsin!”, — degan Checheniston rahbari.
Eslatib o‘tamiz, Usmonxon Alimov so‘nggi vaqtlarda Moskvada davolanayotgan edi — u o‘pka va qon-tomir kasalliklari, xususan, o‘pka pnevmoniyasi bo‘yicha muolajalar olayotgan edi. Muftiyning janoza namozi va ta’ziya marosimlari 16-avgust kuni Samarqand viloyati Ishtixon tumani Orlot qishlog‘i “Eshoni Temirxon To‘ra” (avvalgi “Orlot” masjidi) jome masjidida bo‘lib o‘tadi.
Izoh (0)