Mo‘ynoq tumanida 10-avgust kuni Qoraqalpog‘iston chempionati 8-turi doirasida kechgan “Mo‘ynoq Siti” va “Jayxun” jamoalari o‘rtasidagi o‘yin vaqtida ommaviy janjal yuzaga kelgan. Mazkur holat yuzasidan Ichki ishlar vazirligi matbuot kotibi ma’lumot berdi.
Uchrashuvning 67-daqiqasida ikki jamoa futbolchilari o‘rtasida tortishuv yuzaga kelgan. Shundan keyin janjalga ikki tomon futbolchilari va tomoshabinlar aralashgan.
“Stadionga jamoat tartibini saqlash maqsadida biriktirilgan tuman IIB va Milliy Gvardiya xodimlari tomonidan amalga oshirilgan harakatlar natijasida janjal to‘liq bartaraf etilib, fuqarolar tomonidan tartib buzilishiga yo‘l qo‘yilmagan.
Mazkur holat oqibatida o‘yin ishtirokchilari, hakamlar va tomoshabinlar orasida tan jarohatini olib kasalxonaga murojaat qilganlar bo‘lmagan. Hozirda, jamoat tartibini buzishga sababchi bo‘lgan fuqarolarning barchasini shaxsi aniqlanib, ularning harakatlariga huquqiy baho berish bo‘yicha surishtiruv ishlari amalga oshirilmoqda”, — deyiladi bayonotda.
Eslatib o‘tamiz, iyul oyi boshida Superliga doirasidagi “Nasaf” — “So‘g‘diyona” uchrashuvida ikki jamoa futbolchilari o‘rtasida janjal bo‘lib o‘tgandi. 2020-yilning dekabr oyida “Neftchi” va “Turon” o‘rtasidagi Pro-Liganing so‘nggi tur o‘yinida hakamlarga nisbatan “Neftchi” futbolchilari va muxlislari tomonidan tajovuzkor harakatlar amalga oshirilgandi. Natijada bir nechta kishiga jinoiy ish qo‘zg‘atilgan, Nasibullayevga oyoq bilan zarba bergan Jamshid To‘raqulov 10 yilga futbolga oid har qanday faoliyatdan chetlatilgan, “Neftchi” esa 100 million so‘m jarimaga tortilgandi.
Izoh (0)