“PSJ” hujumchi Lionel Messi bilan kelishuv imzolanganini e’lon qildi.
Tomonlar bir yilga uzaytirish bandi bilan ikki yillik shartnoma imzolagan. Avvalroq Messi yangi jamoasida yiliga 35 million yevro maosh olishi xabar qilingandi.
Messi parijliklar safida 30-raqam ostida harakat qiladi.
Messi “PSJ”ga erkin agent maqomida kelib qo‘shildi. Argentinalik futbolchi “Barselona” bilan shartnomani uzaytirmadi.
“PSJ”da boshlanajak hayotimdagi yangi bosqichni intiqlik bilan kutyapman. Klub va uning qarashlari mening maqsadlarimga to‘liq mos tushadi. Bu yerdagi o‘yinchilar va xodimlar naqadar iqtidorli ekanini bilaman. “Park de Prens”da maydonga tushishni intiqlik bilan kutyapman.Lionel Messi, futbolchi
Lionel Messi “Barselona” tarbiyalanuvchisi hisoblanadi. U 2000-yildan beri klub tizimida harakat qilib kelar, 2003-yildan esa asosiy jamoada o‘ynardi. U katalon klubi bilan Ispaniya chempionati (10), Ispaniya Kubogi va Superkubogi (7 tadan), Chempionlar Ligasi (4), Yevropa Superkubogi va klublar o‘rtasidagi Jahon Chempionati (3 martadan) bosh sovrinlarini qo‘lga kiritgan.
Messi faoliyati davomida “Barselona”dan boshqa jamoada o‘ynamagan. U “ko‘k-anorranglilar” safida umumiy hisobda 778 ta o‘yin o‘tkazib, 672 ta gol va 305 ta golli uzatmani amalga oshirgan. Uning jamoa bilan qo‘lga kiritgan sovrinlari soni esa 35 tani tashkil qiladi.
Izoh (0)