Kataloniya bilan Parij orasida. Ham “Barselona”, ham “PSJ” safida o‘ynagan futbolchilar

Lionel Messi “Barselona”ni erkin agent sifatida tark etdi va Fransiyaning “PSJ” jamoasi bilan shartnoma imzoladi. Parijliklar so‘nggi yillardagi eng yirik ikkinchi transferni amalga oshirdi, bunisida ham “Barselona” vakili olib kelindi. Ushbu maqolada ikkala jamoa safida ham to‘p surgan futbolchilar haqida so‘z boradi.

Frederik Deyu (Fransiya)

• “Barselona” (1999—2000): 11 o‘yin, 1 ta gol
• “PSJ” (2000—2004): 118 o‘yin, 6 ta gol

Fransiyalik himoyachilar “Kamp Nou”da doim ham o‘zini ko‘rsata olmaydi. 90-yillarda Loran Blan Kataloniyaga kelgan edi, ammo bir mavsumdan so‘ng “Barselona”ni tark etgan. “Lans”ning uzoq yillik yetakchisi Frederik Deyudan ham ko‘p narsa kutilgandi. Fransuz juda oz muddat o‘ynadi, “Barselona” muxlislari uni unutib ham yubordi, lekin “ko‘k-anorranglilar” Deyuning ortidan yaxshigina pul ishlab oldi. Erkin agent sifatida Kataloniyaga tashrif buyurgan Frederik bir yildan so‘ng 6 million yevro evaziga “PSJ” jamoasiga o‘tdi. Parijda Deyuning ishlari yurishib ketdi. To‘rt mavsum parijliklar sharafini himoya qilgan himoyachi Fransiya Kubogini qo‘lga kiritishga muvaffaq bo‘ldi.

Mikel Arteta (Ispaniya)

• “Barselona” (1997—2000): yoshlar jamoasida o‘ynagan
• “PSJ” (2000—2002): 53 o‘yin, 5 ta gol

Arteta “PSJ”ga “Barselona”ning ikkinchi jamoasidan ikki yillik ijara asosida o‘tgan. U yerda Ronaldinyo bilan birga o‘ynagan Mikel ancha tajriba to‘pladi va ikki yildan keyin kataloniyaliklar futbolchini “Glazgo Reynjers”ga 8 million yevroga sotib yubordi. Arteta faoliyatining eng yorqin damlarini “Tumanli Albion”da o‘tkazdi. Parijda tajriba to‘pladi, “Barselona” safida biror marta maydonga tushmagan bo‘lsa-da, jamoaga moliyaviy tomondan yordami tegdi.

Ronaldinyo (Braziliya)

• “PSJ” (2001—2003): 55 o‘yin, 17 ta gol
• “Barselona” (2003—2008): 207 o‘yin, 94 ta gol

“Barselona” va “PSJ”da to‘p surgan futbolchilar ichida eng asosiy yulduzlardan biri. “Oltin to‘p” egasi Yevropaga sayohatini Parijdan boshlagan. Xoan Laporta prezidentlik saylovi oldidan “Manchester Yunayted”dan Devid Bekhemni olib kelishga va’da bergandi, ammo “Real” chaqqonlik qilib ingliz futbolchisini o‘z safiga qo‘shib olgach, butun diqqat Ronaldinyoga qaratildi. Ronaldinyoning faoliyatidagi eng yuqori notalar aynan ispan jamoasi safida bo‘ldi.

Maksvell (Braziliya)

• “Barselona” (2009—2012): 90 o‘yin, 2 ta gol
• “PSJ” (2012—2017): 214 o‘yin, 13 ta gol

Braziliyalik futbolchi Zlatan Ibrohimovichning yaqin do‘sti. Maksvell shvetsiyalik hujumchi bilan “Ayaks”, “Inter” va “Barselona”da birga to‘p surgan. Zlatanning iltimosiga ko‘ra Maksvell Parijga yo‘l oldi. “PSJ” bu transferdan afsuslanmadi. 3,5 million yevroga xarid qilingan himoyachi parijliklar safida ikki yuzdan ortiq o‘yinda ishtirok etdi. Shvetsiyalik do‘stidan farqli ravishda Maksvell “Barselona” bilan 2011-yilda Chempionlar Ligasida zafar quchgan.

Lyuka Din (Fransiya)

• “PSJ” (2013—2016): 44 o‘yin
• “Barselona” (2016—2018): 46 o‘yin, 2 ta gol

Lyuka Din Parij jamoasiga moslasha olmadi. 2 mavsum zaxirada o‘tirganidan so‘ng, “Roma”ga ijaraga berib yuborildi. 2016-yilda “Barselona” futbolchini xarid qildi. Ammo katalonlar safida Xordi Alba borligi sabab Lyuka Din u bilan raqobat qila olmadi. Ispaniyalik futbolchi har tomonlama fransuzdan ustun edi. “Barselona”da o‘tkazgan ikki mavsumidan so‘ng Din Angliyaga yo‘l oldi. “Everton” fransiyalik himoyachining yangi jamoasiga aylandi.

Rishar Dyutruel (Fransiya)

• “PSJ” (1991—1996): 10 o‘yin
• “Barselona” (2000—2002): 15 o‘yin

Darvozabon Dyutruel “PSJ” tarbiyalanuvchisi hisoblanadi. Ammo asosiy jamoadagi 5 mavsum davomida Bernar Lamani raqobatda yenga olmadi. Yangi jamoa izlash vaqti kelganini bilgan Rishar Ispaniyaning “Selta” jamoasiga o‘tadi. “Barselona” darvozabonning Vigodagi ajoyib o‘yinlaridan so‘ng sotib olishni maqsad qildi. Kataloniyaliklar safida ham Dyutruel o‘z o‘rnini topa olmadi. Viktor Valdes asosiy darvozabon bo‘lishini bilgach, Rishar “ko‘k-anorranglilar” safini tark etdi.

Xuan Pablo Sorin (Argentina)

• “Barselona” (2003): 15 o‘yin, 1 ta gol
• “PSJ” (2003—2004): 21 o‘yin, 1 ta gol

Argentinalik futbolchi 2002/03-yilgi mavsumning ikkinchi qismini “Barselona”da o‘tkazdi. Keyin esa “PSJ”ga o‘tdi. “Kruzeyro” Xuan Pabloni Yevropa safariga yuborgan edi. Kataloniya va Parij jamoalaridan avval Sorin “Yuventus” va “Latsio”da ham o‘ynashga ulgurgan. Lekin janubiy amerikalik futbolchini hech bir klub o‘z safida olib qolishni istamagan. Faqatgina “Vilyarreal” unga shartnoma taklif qildi.

Lyudovik Jyuli (Fransiya)

• “Barselona” (2004—2007): 124 o‘yin, 26 ta gol
• “PSJ” (2008—2011): 125 o‘yin, 19 ta gol

Fransuz futbolchisi ikkala jamoa muxlislarining ham yodida qolgan. Jyuli “Barselona” bilan birga ikki marta Ispaniya chempionligi va bir marta Chempionlar Ligasi kubogini qo‘lga kiritgan bo‘lsa, “PSJ” bilan Fransiya Kubogiga ega chiqqan. “Barselona” bilan “PSJ” orasida Lyudovik “Roma” safida o‘ynashga ham ulgurgan.

Tiago Motta (Braziliya/Italiya)

• “Barselona” (1999—2007): 139 o‘yin, 9 ta gol
• “PSJ” (2012—2018): 229 o‘yin, 12 ta gol

Tiago 17 yoshida “Barselona” bilan shartnoma imzolagan. Avvaliga “Barselona B” jamoasida o‘ynagan futbolchi keyinchalik asosiy jamoaga o‘tgan. Kataloniyadagi 8 yilidan so‘ng Motta jarohatlar sabab raqobatga dosh bera olmadi va “Atletiko”ga o‘tib ketishga majbur bo‘ldi. 2012-yilda 11,5 million yevro evaziga “PSJ”ga o‘tdi va 2018-yilga qadar parijliklar sharafini himoya qildi.

Zlatan Ibrohimovich (Shvetsiya)

• “Barselona” (2009—2010): 46 o‘yin, 22 ta gol
• “PSJ” (2012—2016): 180 o‘yin, 156 ta gol

Ibrohimovich Kataloniya jamoasiga 2009-yilda kelib qo‘shildi va darhol moslashib ketdi. Ammo keyinchalik Pep Gvardiola va jamoa yetakchilari bilan til topisha olmagach, “Milan”ga ketishga majbur bo‘ldi. Italiyadagi 2 mavsumidan so‘ng Zlatan “PSJ”ga ketishga rozi bo‘ldi. Parij jamoasi afsonasiga aylanishi uchun unga 4 yil kifoya qildi.

Neymar (Braziliya)

• “Barselona” (2013—2017): 186 o‘yin, 105 ta gol
• “PSJ” (2017-yildan hozirgacha): 116 o‘yin, 87 ta gol

Neymar hozirgi kunda dunyoning eng kuchli futbolchilaridan biri. 2013-yilda “Santos” safidan “Barselona”ga o‘tgan futbolchi Messi va Suares bilan birgalikda ajoyib uchlik hosil qildi, ko‘plab sovrinlarni qo‘lga kiritdi. Kutilmaganda 2017-yil rekord transfer (222 million yevro) evaziga “PSJ”ga o‘tib ketdi. Parijliklar safida Neymar o‘z darajasini namoyish etmoqda. Mbappe bilan birgalikda “PSJ” hujumida raqiblarni ranjitishda davom etyapti.

Dani Alves (Braziliya)

• “Barselona” (2008—2016): 391 o‘yin, 21 ta gol
• “PSJ” (2017—2019): 73 o‘yin, 8 ta gol.

Braziliyalik futbolchi 2008-yilda “Sevilya” safidan “Barselona”ga o‘tadi. O‘ng qanot himoyasida jamoadan endigina ketgan Zambrottaning o‘rnini egallaydi. Alves “Barselona” safida ham ko‘plab sovrinlarni qo‘lga kiritadi. Hozirgi kunda eng ko‘p sovrinni qo‘lga kiritgan futbolchi sifatida e’tirof etilayotgan Dani Alves 23 ta kubok bilan Kataloniyani tark etdi. Italiyaning “Yuventus”idagi bir yillik “sayohat”dan so‘ng Alves Parijga yo‘l oladi.

“PSJ”da ham ikki mavsum to‘p surgan Alves 6 ta sovrinni o‘z hisobiga yozdirib qo‘yib, Parijni tark etdi. 2019-yilda braziliyalik futbolchi “San-Paulu” bilan 3 yillik shartnomaga imzo chekdi.

Lionel Messi (Argentina)

• “Barselona” (2003—2021): 835 o‘yin, 709 ta gol
• “PSJ” (2021-yil)

Lionel Messi futbol tarixidagi eng yaxshi futbolchilardan biri. “Barselona” asosiy jamoasidagi 18 yili davomida Lionel erishish mumkin bo‘lgan barcha sovrinlarni qo‘lga kiritdi. 5-avgust kuni yangi shartnoma imzolash uchun “Barselona” bazasiga tashrif buyurgan Messi kataloniyaliklar bilan hamkorlikni to‘xtatishga majbur bo‘lishi haqidagi xabarni eshitdi. La Liga qoidalariga ko‘ra “Barselona” Leo bilan shartnoma imzolay olmasligi ma’lum bo‘ldi. Erkin agentga aylangan Messi parijliklar bilan muzokara olib bordi va “PSJ” futbolchisiga aylandi.