Tokio—2020 Olimpiadasida 5-avgust kuni erkin kurash bo‘yicha -86 kg vazn toifasi bronza medali uchun o‘zbekistonlik Javrail Shapiyev va Rossiya vakili Artur Nayfonov gilamga chiqdi. Unda Nayfonov g‘oliblikni qo‘lga kiritib, Olimpiada bronza medaliga sazovor bo‘ldi. Nayfonov aslida kim?
24 yoshli Arturning millati osetin. U Nijnevartovskda tavallud topgan, keyinchalik oilasi bilan birga Shimoliy Osetiyaga ko‘chib o‘tgan. 2004-yil 1-sentabrda Beslandagi maktabga qabul qilinadi. Aynan shu maktab terrorchilar tomonidan ikki yarim kun mobaynida egallab turildi. Minalangan binoda 1128 nafar kishi garovda ushlab turildi: bolalar, ota-onalar va maktab xodimlari. Rossiya tarixidagi eng katta teraktlardan birida 333 kishi halok bo‘ldi, 783 kishi jarohatlandi. Artur, uning 10 yoshli singlisi Sabina va ulardan tashqari garovga olingan kishilar kichik tan jarohati oldi. Arturning 32 yoshli onasi Svetlana Nayfonova terakt oqibatida vafot etdi.
“Arturning onasi vafot etdi. Ammo uning sharofati bilan aka-singil maktabdan tirik chiqdi. Balki taqdiriga shu yozilgandir”, — deydi Nayfonovning murabbiyi Totraz Archegov.
Bo‘lajak Olimpiyachi o‘smirlik yoshidan erkin kurash bilan shug‘ullanishni boshlagan. 20 yoshida Vladikavkaz milliy birinchiligi chempioni bo‘lgan va bir yildan so‘ng Rossiya terma jamoasidan chaqiruv olgan. Shundan so‘ng uch marta Yevropa chempioni bo‘lgan. 2019-yilda esa Jahon chempionligini qo‘lga kiritgan.
Nayfonovning bronza medali rossiyaliklar uchun ushbu musobaqadagi 20-medal bo‘ldi. Ammo murabbiy Totraz Archegovning aytishi bo‘yicha, bu xursandchilik keltirmagan.
“Osetiya uchun faqat oltin bor. Uning o‘zi ham unchalik xursand emas. Yaxshiroq qilishi mumkin bo‘lgan ishini qildi, xolos. Jarohatlar unga xalaqit berdi. Ha, u mamlakat uchun medal yutdi, bu ham hisoblanadi. Keling, yaxshisi bu haqida gaplashmaylik”, — deydi Archegov.
Bronzadan xursandmisiz? Oltin olganchalik emas. Shunisiga ham shukur, har kuni ham Olimpiya medalini qo‘lga kiritib bo‘lmaydi. Qanaqadir fojia yuz beryapti deb o‘ylamang, men hali yoshman, hammasi oldinda. Jarohat bormi? Yo‘lbarslar bilan olishgandan keyin shunaqa bo‘ladi. Medalni qo‘lga kiritish lozim, g‘alabaga o‘zimni tayyorladim, oltin haqidagi o‘ylarni chetga uloqtirishga urindim. Endi uyga boraman va jarohatimni davolayman, shundan keyin yana jangga kirishaman. Biz yana qaytamiz.Beslandagi teraktni boshqa bir osetiyalik kurashchi ham eslaydi. 25 yoshli Zaurbek Sidakov -74 kg vazn toifasida Olimpiya o‘yinlari oltin medalini qo‘lga kiritdi. U o‘z yo‘lida o‘zbekistonlik Bekzod Abdurahmonovni yengdi, Bekzod keyinchalik bronzaga ega chiqdi. U Shimoliy Osetiyaning Zilgi qishlog‘ida tug‘ilib-o‘sgan, mashg‘ulotlar va maktab uchun Beslanga borardi. U manziliga ba’zan transportda, ba’zan piyoda borishiga to‘g‘ri kelardi.Artur Nayfonov, kurashchi
2004-yil sentabrda Zaurbek 8 yoshda edi. “Men bilan birga mashg‘ulotlarga borgan do‘stlarim o‘sha maktabda garovda bo‘lgan va bu voqealarni boshidan o‘tkazgan”, — deydi sportchi. Terakt haqidagi xabardan so‘ng Sidakov va do‘stlari maktabdan chiqarib yuborilgan: “Biz bola edik, lekin shunda ham bu nima ekanini tushungandik. Uyga qaytganimizda esa garovga olingan maktab haqidagi lavhalar xabarlarda berilayotgan edi”.
Bo‘lib o‘tgan voqeadan so‘ng Zaurbekning ota-onasi farzandining Beslanga borishiga ruxsat bermadi, shunda ham u erkin kurashni tashlamadi. Sidakov uch marta Rossiya, ikki marta jahon chempioniga aylandi. 2019-yil Budapeshtda bo‘lib o‘tgan jahon chempionatidagi g‘alabasini Beslan fojiasi qurbonlariga bag‘ishladi.
“15 yillik fojiani xotirlash uchun yig‘inda videomaterial tomosha qildik. Ota-onalar va aybsiz farzandlar nimalar his qilganini so‘z bilan ta’riflab bo‘lmaydi. Shuning uchun kurashda yirik g‘alabaga erishadigan bo‘lsam, uni Beslandagi teraktda jabrlanganlarga bag‘ishlayman deb o‘zimga va’da bergandim. Men bu va’damni bajardim”, — degandi Sidakov.
Izoh (0)