Мўйноқ туманида 10 август куни Қорақалпоғистон чемпионати 8-тури доирасида кечган «Мўйноқ Сити» ва «Жайхун» жамоалари ўртасидаги ўйин вақтида оммавий жанжал юзага келган. Мазкур ҳолат юзасидан Ички ишлар вазирлиги матбуот котиби маълумот берди.
Учрашувнинг 67-дақиқасида икки жамоа футболчилари ўртасида тортишув юзага келган. Шундан кейин жанжалга икки томон футболчилари ва томошабинлар аралашган.
«Стадионга жамоат тартибини сақлаш мақсадида бириктирилган туман ИИБ ва Миллий Гвардия ходимлари томонидан амалга оширилган ҳаракатлар натижасида жанжал тўлиқ бартараф этилиб, фуқаролар томонидан тартиб бузилишига йўл қўйилмаган.
Мазкур ҳолат оқибатида ўйин иштирокчилари, ҳакамлар ва томошабинлар орасида тан жароҳатини олиб касалхонага мурожаат қилганлар бўлмаган. Ҳозирда, жамоат тартибини бузишга сабабчи бўлган фуқароларнинг барчасини шахси аниқланиб, уларнинг ҳаракатларига ҳуқуқий баҳо бериш бўйича суриштирув ишлари амалга оширилмоқда», — дейилади баёнотда.
Эслатиб ўтамиз, июль ойи бошида Суперлига доирасидаги «Насаф» — «Сўғдиёна» учрашувида икки жамоа футболчилари ўртасида жанжал бўлиб ўтганди. 2020 йилнинг декабрь ойида «Нефтчи» ва «Турон» ўртасидаги Про-Лиганинг сўнгги тур ўйинида ҳакамларга нисбатан «Нефтчи» футболчилари ва мухлислари томонидан тажовузкор ҳаракатлар амалга оширилганди. Натижада бир нечта кишига жиноий иш қўзғатилган, Насибуллаевга оёқ билан зарба берган Жамшид Тўрақулов 10 йилга футболга оид ҳар қандай фаолиятдан четлатилган, «Нефтчи» эса 100 миллион сўм жаримага тортилганди.
Изоҳ (0)