Fotogalereya. Besh yil kutilgan Tokio—2020 Olimpiadasining eng yorqin suratlari
Tokio—2020 Olimpiadasi 23-iyuldan 8-avgustga qadar bo‘lib o‘tdi. Koronavirus pandemiyasi sabab sportchilar va muxlislar Olimpiadani bir yil ko‘proq kutishga majbur bo‘ldi. Mazkur Olimpiadaning eng yorqin va diqqatga sazovor suratlari jamlandi. Quyida ular bilan tanishing.
Yaponiya ramzlaridan biri hisoblangan Fudziyama tog‘lari atrofida o‘tkazilayotgan yelkanli qayiqlar poygasida ishtirok etayotgan britaniyalik Saskiya Tidi va Sharlott Dobson. Bu yo‘nalishda braziliyalik sportchilar g‘olib bo‘ldi.Foto: Getty Images
3000 metr masofaga to‘siqlar osha yugurish musobaqasida Marokash vakili Sufian al-Bakkali g‘olib bo‘ldi.Foto: Reuters
AQSh gimnastika terma jamoasi yetakchisi, to‘rt karra Olimpiada chempioni Simona Bayls omadsiz chiqishdan keyin jamoaviy ko‘pkurash bo‘yicha final bahslarini tark etdi. Bayls bu qarorini “o‘zining ruhiy holatini tiklashga e’tibor qaratish” istagida ekani bilan izohladi. Sportchi yakkalik musobaqalarda brusdagi mashqlar va tayanib sakrashdan voz kechdi. Biroq shunday bo‘lsa-da, xoda ustida mashq yo‘nalishida ishtirok etdi. Bayls paydo bo‘lganda zal uni olqishlar bilan kutib oldi va yakunda sportchi bronza medalini qo‘lga kiritdi.Foto: AFP
Faoliyatidagi sakkizinchi Olimpiadasida qatnashgan Oksana Chusovitina Tokiodagi ishtirokini saralashdayoq tugatdi va olqishlar ostida katta sportdagi faoliyatini yakunladi.Foto: Getty Images
Niderlandiyalik Matyo van der Pul mauntinbayk bo‘yicha favoritlardan biri edi. Biroq u Olimpiadada muvaffaqiyatsiz harakat qildi va hatto sovrindorlar qatoriga kira olmadi. Ushbu sport turida britaniyalik Tomas Pidkok g‘olib bo‘ldi.Foto: AP Photo
Qilichbozlikning sablya yo‘nalishi vakillari Aron Siladyi (Vengriya) va Luiji Samele (Italiya) jamoaviy bahslar yarim finalida. Bu ikki sportchi yakkalik musobaqasi finalida ham to‘qnash kelgandi. Jamoaviy musobaqalarda Janubiy Koreya vakillari g‘olib bo‘ldi, italiyaliklar kumushga ega chiqqan bo‘lsa, vengerlar bronzani qo‘lga kiritdi.Foto: Getty Images
Yaponiyalik aka-singil dzyudochilar Hifumi Abe va Uta Abe bir soatlik farq bilan ikkita oltin medalni qo‘lga kiritdi.Foto: Getty Images
Tokio Olimpiadasida tarixda ilk bor syorfing bo‘yicha bellashuvlar o‘tkazildi. Suratda uchinchi o‘rin uchun kechayotgan bahsda kurash olib borayotgan braziliyalik Gabriel Medina. U bronzani avstraliyalik Ouen Raytga boy berib qo‘ydi. Syorfing bo‘yicha Olimpiadaning ilk chempioni braziliyalik Italo Ferreyra bo‘ldi.Foto: AFP
Dzyudo bo‘yicha +100 kg vazn toifasi vakillari yaponiyalik Xishayoshi Xarasava va chexiyalik Lukash Krpalek yarim finalda. Krpalek finalda gruziyalik Guram Tushishvilini mag‘lub etib, ikki karra Olimpiya chempioniga aylandi. Polshalik sportchi chorak finalda O‘zbekiston vakili Bekmurod Oltiboyevni qiyinchilik bilan mag‘lub etgandi.Foto: Reuters
Bahodir Jalolov finalda AQSh vakili Richard Torresni mag‘lubiyatga uchratdi. Jalolov Torresni 2019-yilgi Jahon chempionatida kuchli nokautga uchratgandi, bu safar esa Bahodir nokdaun bilan cheklandi.Foto: Getty Images
Erkaklar o‘rtasida 100 metrga yugurish musobaqalari doim qiziqarli kurashlarga boy bo‘lgan. Tokiodagi Olimpiadada ham ushbu an’ana saqlanib qoldi. Italiyalik Marsel Jeykobs Olimpiya chempioniga aylandi. Jeykobs 20 yil deganda ushbu musobaqada g‘olib chiqqan dastlabki yevropalik va tarixdagi ilk italyan bo‘ldi.Foto: Getty Images
Britaniyalik Tom Deyli 10 metr balandlikdan suvga sinxron sho‘ng‘ish musobaqasida oltin medalga ega chiqdi. Shuningdek, uning tribunada o‘z itiga jemper to‘qib o‘tirishi tasvirlangan surat ham mashhur bo‘ldi.Foto: PA
Erkaklar o‘rtasida balandlikka sakrash musobaqasida kumush medal egasiz qoldi. Qatarlik Mutaz Barshim va italiyalik Janmarko Tamberi bir xil imkoniyatda, bir xil natija (2,37 metr) qayd etdi. Ular o‘zaro kelishuvga ko‘ra qo‘shimcha kurashda ishtirok etmaydigan bo‘ldi va tashkilotchilar ikki sportchiga ham oltin medal taqdim etdi.Foto: Reuters
Navbatdagi balandlikni zabt etgan o‘zbekistonlik sportchi Safina Sa’dullayeva tayoqdan tushib ketmaslikni “so‘ramoqda”.Foto: Getty Images
400 metrga to‘siqlar osha yugurish musobaqalari yomg‘ir ostida kechdi. Finalga qadar ob-havo yaxshilandi. Amerikalik Sidni Maklaflik dunyo rekordini o‘rnatib (51,46 soniya), Olimpiada chempioniga aylandi.Foto: Reuters
Avstraliyalik suzuvchi Emma Makkeon Olimpiada rekordini o‘rnatdi. U Tokiodagi o‘yinlarda to‘rtta oltin va uchta bronzaga ega chiqdi.Foto: EPA
Amerikalik Tara Devis uzunlikka sakrash musobaqasi favoritlaridan biri edi. Devis finalga chiqdi, biroq medallar uchun kurasha olmadi. Germaniya vakili Malayka Mihambo chempionlikni qo‘lga kiritdi.Foto: Getty Images
Muattar Nabiyeva dast ko‘tarish mashqlarida 98 kilogrammlik toshni bo‘ysundirib, Olimpiada rekordini o‘rnatdi. Siltab ko‘tarish bahslarida unga biroz omad yetishmadi va medallar uchun unga 1 kg yetmadi.Foto: Getty Images
Izoh (0)