Londondan Rossiyaning Pskov viloyatigacha bo‘lgan 2 ming kilometrlik masofani uchib o‘tgan ko‘rshapalak rekord o‘rnatdi. Oxir-oqibat u mushukning qurboniga aylangan, deb xabar beradi Esquire.
Bu o‘rmon pipistrellesi turiga kiruvchi mitti urg‘ochi ko‘rshapalak bo‘lgan. Uning o‘lchami qo‘ldagi bosh barmoqdek keladi, og‘irligi esa 8 gramm.
Ko‘rshapalakni Molgino qishlog‘ida istiqomat qiluvchi Svetlana Lapina ismli ayol topib olgan va uni mutaxassislarga topshirgan. Mahalliy mushuk hujumidan so‘ng, ko‘rshapalakni qutqarishga urinishgan, biroq buning foydasi bo‘lmagan.
Ko‘rshapalakda London hayvonot bog‘iga tegishli ajratuvchi belgi bo‘lgan. Rossiyalik mutaxassislar bu haqda Buyuk Britaniya ko‘rshapalaklarni himoya qilish fondiga ma’lum qilgan. Ma’lum bo‘lishicha, unga ushbu halqani 2016-yilda hayvonot bog‘idagi Brayan Briggs ismli naturalist o‘rnatgan.
“Bu kabi noodatiy hayvonlarni saqlab qolish bo‘yicha xalqaro ishga o‘z hissangni qo‘shish va ularning qiziqarli hayot tarzi haqida ko‘proq ma’lumot bilish imkoniyatiga ega bo‘lish naqadar ajoyib”, — deydi Briggs.
Ko‘rshapalaklarni saqlab qolishga ixtisoslashgan Bat Conservation Trust xizmati rahbari Liza Uorlej Rossiyadan topilgan ushbu ko‘rshapalakni “Olimpiada chempioni” deb atagan. “Bu Buyuk Britaniyadan Yevropa bo‘ylab eng uzoq masofaga sayohat qilgan ro‘yxatga olingan ko‘rshapalaklardir”, — deydi u.
Mutaxassislarning fikricha, bu turdagi o‘rmon ko‘rshapalaklari iqlim o‘zgarishlari sabab dunyoning uzoq nuqtalariga ko‘chishni boshlagan.
Mavzuga doir: Rekordchi kakku 2 oyda 16 ta mamlakat ustidan uchib, Zambiyadan Mo‘g‘ulistonga yetib bordi
Izoh (0)