Лондондан Россиянинг Псков вилоятигача бўлган 2 минг километрлик масофани учиб ўтган кўршапалак рекорд ўрнатди. Охир-оқибат у мушукнинг қурбонига айланган, деб хабар беради Esquire.
Бу ўрмон пипистреллеси турига кирувчи митти урғочи кўршапалак бўлган. Унинг ўлчами қўлдаги бош бармоқдек келади, оғирлиги эса 8 грамм.
Кўршапалакни Молгино қишлоғида истиқомат қилувчи Светлана Лапина исмли аёл топиб олган ва уни мутахассисларга топширган. Маҳаллий мушук ҳужумидан сўнг, кўршапалакни қутқаришга уринишган, бироқ бунинг фойдаси бўлмаган.
Кўршапалакда Лондон ҳайвонот боғига тегишли ажратувчи белги бўлган. Россиялик мутахассислар бу ҳақда Буюк Британия кўршапалакларни ҳимоя қилиш фондига маълум қилган. Маълум бўлишича, унга ушбу ҳалқани 2016 йилда ҳайвонот боғидаги Брайан Бриггс исмли натуралист ўрнатган.
«Бу каби ноодатий ҳайвонларни сақлаб қолиш бўйича халқаро ишга ўз ҳиссангни қўшиш ва уларнинг қизиқарли ҳаёт тарзи ҳақида кўпроқ маълумот билиш имкониятига эга бўлиш нақадар ажойиб», — дейди Бриггс.
Кўршапалакларни сақлаб қолишга ихтисослашган Bat Conservation Trust хизмати раҳбари Лиза Уорлеж Россиядан топилган ушбу кўршапалакни «Олимпиада чемпиони» деб атаган. «Бу Буюк Британиядан Европа бўйлаб энг узоқ масофага саёҳат қилган рўйхатга олинган кўршапалаклардир», — дейди у.
Мутахассисларнинг фикрича, бу турдаги ўрмон кўршапалаклари иқлим ўзгаришлари сабаб дунёнинг узоқ нуқталарига кўчишни бошлаган.
Аввалроқ Австралияда қанотлари эгаси томонидан кесилган тўтиқушга донор патлари кўчириб ўтказилгани тўғрисида хабар берилганди.
Изоҳ (0)