Germaniyaning Xaykendorf shahrida yashovchi nafaqaxo‘rning uyidan “Pantera” tanki, shuningdek, Ikkinchi jahon urushi davriga tegishli zenit quroli, torpeda va o‘q-dorilar topilgani to‘g‘risida xabar berilgandi. Esquire’ning yozishicha, 84 yoshli erkak 250 ming yevro jarimaga tortilgan.
Kil shahri okrug sudi 84 yoshli erkakka nisbatan 14 oyga shartli ozodlikdan mahrum etish hamda 250 ming yevro jarima jazosini tayinladi. Sud, shuningdek, ayblanuvchining zimmasiga 45 tonnali tank hamda zenit qurolini ikki yil ichida muzey yoki kolleksionerga sotish yoki sovg‘a qilish majburiyatini yuklagan.
Ayblanuvchi advokatining so‘zlariga ko‘ra, Amerikadagi muzeylardan biri nafaqaxo‘rning tankini sotib olishga qiziqish bildirgan. Amerikalik tarixchilarning ta’kidlashicha, bu Germaniya tomonidan Ikkinchi jahon urushida foydalanilgan eng samarali jangovar mashina hisoblanadi.
Nafaqaxo‘rning uyidagi tintuv san’at asarini o‘g‘irlashda gumonlangani sabab o‘tkazilgan. Biroq natijada qurollar topilgan, yerto‘lada esa haqiqiy tank — “Pantera” joylashgan. Germaniya harbiylarining o‘lchovlari bo‘yicha bu kabi tank o‘rtacha hisoblanadi, sovet hujjatlarida esa model og‘ir sinfga kiritiladi.
Izoh (0)