“Tarqalayotgan test savollari rasmlarini bizga ham yuborsangiz, tegishli choralarni ko‘ramiz”. DTM vakili kirish imtihonlarida adolatni birgalikda o‘rnatishga chaqirdi

Davlat test markazi direktori o‘rinbosari Sardor Rajabov aholini OTMlarga kirish imtihonlarida adolatni birgalikda o‘rnatishga chaqirdi.

“Test sinovlari boshlanganiga ham uch kun bo‘ldi. Barcha abituriyentlarga birinchi navbatda o‘z bilimingizga ishonishingizni, agar kimdir qoidani buzayotgan bo‘lsa, bu to‘g‘risida ma’lumot berishingizni so‘rab qolgan bo‘lardim. Tarqalayotgan test savollari rasmlarini bizga ham yuborsangiz, biz uni guruh kameralari orqali tekshirib, tegishli choralarni ko‘ramiz”, — deb yozadi DTM vakili.

Sardor Rajabov kirish imtihonlarida oldingi kunlardagi chetlatishlarni misol qilib keltirib, g‘irromlik qilayotganlarga birgalikda kurashish kerakligini ta’kidlagan.

“Savollar kitobi raqami berkitilgan bo‘lsa ham, yuboravering”, — deya postini yakunlaydi Rajabov.

Bundan avval Davlat test markazi internetda tarqalgan test materiallari bo‘yicha izoh bergani hamda DTM biologiya fanidan Milliy sertifikat uchun topshirilgan test natijalarini bekor qilgani haqida xabar berilgandi.