Ohangaron shahrida pandemiya sharoitida talab yuqori bo‘lgan dori vositalari qimmat narxlarda sotilishining oldi olindi, deya xabar qilmoqda Bosh prokuratura huzuridagi departament matbuot xizmati.
Departament hamda DBQning Toshkent viloyati boshqarmalari tomonidan Ohangaron shahrida o‘tkazilgan tezkor tadbirda fuqarolar S.A. va D.X. pandemiya sharoitida aholining iste’mol talabi yuqori bo‘lgan dori vositalarini qimmat narxlarda o‘tkazish orqali daromad orttirishni ko‘zlab, xorijda ishlab chiqarilgan 7 xil turdagi, jami 2 098 quti “Geparin”, “Enoksaparin”, “Seftrakson”, “Favipiravir”, “Remdesivir”, “Bakterazon” va “Deksametazon” nomli dori vositalarini xaridorga 160 million so‘mga sotgan vaqtida ashyoviy dalillar bilan ushlangan.
Baholash ekspertizasi xulosasiga ko‘ra, ushbu dori vositalarining umumiy narxi 80,3 million so‘mni tashkil etgan.
Mazkur holat yuzasidan Jinoyat kodeksining 186-3-moddasi (dori vositalarini dorixonalardan va ularning filiallaridan tashqarida realizatsiya qilish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Samarqandda jami 3 ming dollarlik kuchli ta’sir qiluvchi dori vositalarini sotayotgan shaxslar ushlangani, Chilonzorda tadbirkorning 763 mln so‘mlik tibbiy buyum va dorilarini talon-toroj qilgan ombor mudiri va haydovchisiga jinoiy ish ochilgani hamda Toshkent viloyatida 120 million so‘mlik dorini noqonuniy ravishda muomalaga kiritayotgan shaxs ushlangani haqida xabar berilgandi.
Izoh (0)