Давлат тест маркази директори ўринбосари Сардор Ражабов аҳолини ОТМларга кириш имтиҳонларида адолатни биргаликда ўрнатишга чақирди.
«Тест синовлари бошланганига ҳам уч кун бўлди. Барча абитуриентларга биринчи навбатда ўз билимингизга ишонишингизни, агар кимдир қоидани бузаётган бўлса, бу тўғрисида маълумот беришингизни сўраб қолган бўлардим. Тарқалаётган тест саволлари расмларини бизга ҳам юборсангиз, биз уни гуруҳ камералари орқали текшириб, тегишли чораларни кўрамиз», — деб ёзади ДТМ вакили.
Сардор Ражабов кириш имтиҳонларида олдинги кунлардаги четлатишларни мисол қилиб келтириб, ғирромлик қилаётганларга биргаликда курашиш кераклигини таъкидлаган.
«Саволлар китоби рақами беркитилган бўлса ҳам, юбораверинг», — дея постини якунлайди Ражабов.
Бундан аввал Давлат тест маркази интернетда тарқалган тест материаллари бўйича изоҳ бергани ҳамда ДТМ биология фанидан Миллий сертификат учун топширилган тест натижаларини бекор қилгани ҳақида хабар берилганди.
Изоҳ (0)