Qashqadaryoda katta tezlikda yo‘l yoqasidagi do‘konga borib urilgan Nexia haydovchisi halok bo‘ldi

Qashqadaryo viloyati Qamashi tumanida katta tezlikda harakatlangan Nexia yo‘l chetidagi savdo do‘koniga borib urildi. Bu haqda NasafNews xabar berdi.

Viloyat IIB xabariga ko‘ra, hodisa 31-iyul kuni A-378 Samarqand—G‘uzor xalqaro avtomobil yo‘lining Qamashi tumani Uzun mahallasi hududidan o‘tgan 126-kilometrida yuz bergan.

1996-yilda tug‘ilgan Sh.E. Nexia’ni ishonchnoma orqali haydab ketayotganida boshqaruvni yo‘qotgan. Oqibatda mashina yo‘l chetida joylashgan savdo do‘koniga borib urilgan. Zarba kuchli bo‘lgani tufayli savdo do‘konining devori qulab tushgan.

Mazkur yo‘l-transport hodisasi oqibatida haydovchi og‘ir tan jarohatlari olib, voqea yuz bergan joyda vafot etgan.

Dastlabki surishtiruvda aniqlanishicha, haydovchi belgilangan me’yordan ortiq tezlikda harakatlangan va yo‘lning burilish joyiga kelganda boshqaruvni yo‘qotgan. Hozirda hodisa yuzasidan Qamashi tumani IIB YHXB tomonidan surishtiruv olib borilmoqda.

Bundan avval Samarqandda Lacetti katta tezlikdan yo‘l yoqasidagi uyga urilishi oqibatida haydovchi va yo‘lovchi vafot etgani haqida xabar berilgan edi.