O‘zbekistondagi aksariyat tadbirkorlarning moliyaviy savodxonligi yetarli darajada emas. Bu haqda bosh vazir o‘rinbosari, investitsiyalar va tashqi savdo vaziri Sardor Umrzoqov 30-iyul kuni o‘tkazilgan matbuot anjumanida so‘z yuritdi, deya xabar bermoqda “Daryo” muxbiri.
Umrzoqovning qayd etishicha, valyutadagi kreditlarni faqat eksport qiluvchi tadbirkorlarga berish lozim.
“Valyutadagi kreditlarni biz faqat bitta toifaga — eksport qiluvchilarga berishimiz kerak. Nimaga? Ularda valyutada tushum bor va olgan kreditini valyutada yopa oladi. Agar tadbirkor o‘z mahsulotini eksport qilmasdan, faqat mamlakat ichkarisiga sotsa, aylanma daromadini so‘mda olsa, unda so‘mni valyutaga aylantirayotgan paytda qiynalib qoladi. Chunki kurs har doim o‘zgarib boradi. Bu gaplarni hurmatli Prezidentimizning o‘zlari ham aytgan.
2017-yilda o‘sha paytdan oldin bankdan valyutada kredit olgan tadbirkorlarimiz kredit shartnomasiga imzo qo‘yayotganda, valyuta kursi o‘zgarishi xatarini ular o‘z bo‘yniga olgan, rozi bo‘lgan.
Tadbirkorlarimizning moliyaviy savodxonligi yetarli bo‘lmayapti va bo‘lmagan ham. Ammo shunga qaramay, ularni qo‘llab-quvvatlashimiz kerak. Buni oldin o‘zlariga ham aytganman. Tadbirkorlarni qo‘llab-quvvatlash — davlat siyosati. So‘nggi 4,5-5 yil davomida, ayniqsa, o‘tgan yili pandemiya davrida tadbirkorlarni qo‘llab-quvvatlash maqsadida ko‘plab qarorlar, farmonlar qabul qilindi, imtiyozlar berildi va hokazo.
Tadbirkorlarning moliyaviy savodxonligini oshirish bo‘yicha ham birgalikda ishlashimiz kerak. Yaqinda qabul qilingan qarorda davlatimiz rahbari vertikal tizim yaratish bo‘yicha topshiriq bergan. Ya’ni tadbirkorlarga ham har xil yo‘nalishlarda ko‘mak beruvchi tizimni yo‘lga qo‘yish masalasiga kirishdik”, — dedi hukumat vakili.
Bosh vazir o‘rinbosarining ta’kidlashicha, pandemiya tufayli jahon iqtisodiyotida juda ko‘p o‘zgarishlar kuzatilishi mumkin.
“Tadbirkorlarimiz bundan buyog‘iga valyutada kredit olayotganida, chuqur tahlil qilib, faqat daromad bo‘lsagina olishi kerak. Chunki hali jahon iqtisodiyotida pandemiya tugamadi. Postkovid dunyosi qanday bo‘ladi, raqobat avjiga chiqqanida nima bo‘ladi, asosiy xomashyo mahsulotlarining narx-navosi, logistika xarajatlarining qiymati nima bo‘ladi. Shulardan kelib chiqib, hali jahon iqtisodiyotida juda ko‘p o‘zgarishlar bo‘lib ketishi mumkin.
Biz 4,5 yil davomida iqtisodiyotimizni jahon iqtisodiyotiga ochdik. Yuqorida aytilgan jarayonlar ta’sirida qolishga qaysidir ma’noda majburmiz. Bizda valyuta, kurs nuqtayi nazaridan qanday o‘zgarishlar bo‘lishini hech kim bilmaydi.
Shularni inobatga olib, tadbirkorlarni shu xatarlardan sug‘urta qilish, ya’ni ularni ertaga muammo yaratishi mumkin bo‘lgan qobiliyatini kamaytirish bugun birinchi navbatda, tadbirkorlarning o‘zini vazifasi. Shu bilan birga, siz ommaviy axborot vositalari vakillari va bizning ham vazifamiz. Sizlar jarayonlar haqida tadbirkorlar va xalqimizga yetkazsalaringiz, biz hukumat vakillari sifatida hurmatli Prezidentimizning topshiriqlariga asosan, sharoit yaratib berishimiz lozim”, — dedi investitsiyalar va tashqi savdo vaziri Sardor Umrzoqov.
Izoh (0)