31-iyul kuni ijtimoiy tarmoqlarda “Andijon viloyati hokimligi binosi oldini bir nechta ayollar yo‘llarni to‘sgani aytilmoqda” sarlavhasi ostida videolavha tarqalgan edi. Viloyat hokimligi matbuot xizmati ushbu fuqarolar viloyat hokimining qabuliga kelgani, biroq Shuhrat Abdurahmonovning qabul sanasi o‘zgargani sabab ular hokim o‘rinbosari qabuliga kirishni istamasdan, huquqbuzarlik sodir etganini ma’lum qilgan.
Andijon viloyati IIB axborot xizmatining ma’lum qilishicha, mazkur holat yuzasidan Andijonda shahar IIO FMB tomonidan tergovga qadar tekshiruv harakatlari olib borilib, to‘plangan hujjatlar mazmunan ko‘rib chiqish uchun jinoyat ishlari bo‘yicha shahar sudiga yuborilgan.
Ochiq sud majlisida 17 nafar fuqaro Ma’muriy javobgarlik to‘g‘risidagi kodeksning 183 (mayda bezorilik), 194-1 (ichki ishlar organlari xodimining qonuniy talablarini bajarmaslik) hamda 201-modda 1-qismida (yig‘ilishlar, mitinglar, ko‘cha yurishlari yoki namoyishlar uyushtirish, o‘tkazish tartibini buzish nazarda tutilgan huquqbuzarlikni sodir etganlikda aybli deb topilib, ma’muriy javobgarlikka tortilgan. Xususan, huquqbuzarlik sodir etgan 11 nafar fuqaroga nisbatan sakkiz sutkadan 15 sutkagacha ma’muriy qamoq jazosi tayinlangan. Yana olti fuqaroga nisbatan BHMning yetti barobari miqdorida (1,715 million so‘m) jarima belgilangan.
Bundan avval Buxoroda kredit ololmagan ayollar avtomobil yo‘lini to‘sgani, Bog‘otda gaz ta’minoti yo‘qligi sabab aholi yo‘lni to‘sib qo‘ygani haqidagi xabarlar yuzasidan rasmiy ma’lumot berilgani hamda Kegaylida nafaqa pullarini olmagan fuqarolar yo‘lni to‘sgani haqida xabar berilgandi.
Izoh (0)