Qashqadaryo viloyatining Dehqonobod tumani hokimi Zoir Aliqulov tumanda 7683 ta ariza qanoatlantirilmaganini aytib, murojaatlarga e’tiborsiz qarayotgan mas’ullarni keskin tanqid qilgan. Bu haqda “Daryo”ga hokimlik axborot xizmati ma’lum qildi.
Ta’kidlanishicha, 2021-yilning 30-iyul kuni Xalq deputatlari Dehqonobod tuman kengashining oltinchi chaqiriq yigirma sakkizinchi sessiyasi bo‘lib o‘tgan.
Sessiyada so‘z olgan hokim Zoir Aliqulov tumandagi mas’ul tashkilotlarga yo‘llangan 11600 ta arizaning 7683 tasi hamon qanoatlantirilmayotganini ma’lum qilgan. Hokim, shuningdek, aynan qaysi tashkilot nechta murojaatga yechim qilmaganini ham sanab o‘tgan.
“Hokimlikda 1640 ta, tuman mahalla va oilani qo‘llab-quvvatlash bo‘limida 520 ta, tuman Bandlikka ko‘maklashish markazida 1109 ta, tuman IIBda 117 ta, prokuraturada 188 ta, tuman o‘rmon bo‘limida 1 ta, tuman maktabgacha ta’lim bo‘limida 51 ta, tuman Pensiya jamg‘armasida 1712 ta, ‘Agrobank’ tuman filialida 29 ta, Mahalla xayriya jamoat fondida 68 ta, tuman arxitekturada 4 ta, tuman veterinariyada 1 ta, tuman Soliq inspeksiyasida 8 ta, tuman yer resurslarida 31 ta, tuman Sanitariya va epidemiologiya osoyishtalik markazida 6 ta, tuman tibbiyot birlashmada 301 ta, tuman xalq ta’limi bo‘limida 141 ta, tuman moliya bo‘limida 15 ta, tuman gaz ta’minotida 149 ta, tuman elektr tarmoqlari korxonasida 234 ta, sudda 40, MIBda 92 ta, ‘Xalq banki’ tuman filialida 46 ta murojaat qanoatlantirilmagan”, — dedi tuman hokimi.
Hokim tumandagi tashkilot rahbarlariga murojaat qilib, ayni kunlarda barcha muammolar bilan shaxsan o‘zi shug‘ullanayotganini, muammolarning 80 foiziga yechim topilayotganini aytib, barcha mas’ullarni mas’uliyatliroq bo‘lishga chaqirgan.
“Borildi, o‘rganildi, tushuntirish berildi degan shablon gaplar bilan cheklangan. Noinsof, hatto murojaatchining oldiga ham bormagan. Mana biz boryapmiz, uchrashyapmiz, kerak bo‘lsa, chaqirib yarim kechasigacha o‘tirib bo‘lsa ham muammoni yechyapmiz-ku. Barcha muammoni hokimga, prokurorga, IIB boshlig‘iga, soliq rahbariga olib kelsangiz, unda siz rahbar bo‘lib nima qilyapsiz?”, — deydi tuman hokimi.
Hokim hokimlik faoliyatini ham keskin tanqid qilgan.
“11600 ta arizadan bor-yo‘g‘i 900 tasi rozilik, minnatdorlik bor”, — degan tuman hokimi.
Hokimlik axborot xizmatining qo‘shimcha qilishicha, hokim sessiyada deputatlarga yuzlanib, “mana shunday mas’uliyatsiz rahbarlarni ommaga oshkor qilib, jamoatchilik nazoratini kuchaytiraylik, deputat sifatida siz o‘sha mas’uliyatsiz rahbar oldiga borib, hisob so‘rang. Hokim sifatida men ham bajarmayotgan bo‘lsam, mendan ham hisob so‘rang. Sizning haqingiz bor-ku”, degan.
Izoh (0)