Qashqadaryo viloyatining Dehqonobod tumani hokimi Zoir Aliqulov tuman markazidan 180 kilometr uzoqlikda joylashgan Terakli qishlog‘ida bo‘lib, aholi xonadonlaridan birida tunab qoldi. Bu haqda “Daryo”ga xabar bergan tuman hokimligi axborot xizmatining ma’lum qilishicha, hokim qishloq aholisining turmush tarzini shu tarzda o‘rganishni maqsad qilgan.
“Tuman markazidan eng olis hududlarda joylashgan Duob, Terakli, Shaxshor kabi qishloqlarda bo‘lgan hokim shu hudud aholisining yashash tarzini o‘rganish uchun ularning xonadonlarida bo‘ldi. Terakli qishlog‘idagi kam ta’minlangan oila xonadonida tunab qolgan Zoir Aliqulov sovuq ob-havo paytida elektr tokidan uzilib qolayotgan xonadon ahlining dardini his qilib ko‘rdi”, — deyiladi hokimlik axborot xizmati ma’lumotida.
Zoir Aliqulovning olis qishloqdagi tashrifi haqida xabar bergan hokimlik axborot xizmatining yozishicha, tuman rahbari Terakli qishlog‘ida yashovchi, bir necha yildan beri to‘shakka mixlanib qolgan oila bekasi — Nigora Daynovovaning ahvolini ko‘rib, unga ko‘mak berishini ma’lum qilgan.
Nigora Daynovovaning turmush o‘rtog‘i Sherali Donayevga ko‘ra, xotini yiqilib tushib, oyog‘ining ilik suyagini sindirgan va to‘rt yildan beri to‘shakda yotibdi.
“Hokim buva bizning qishloqda yotib qolib, kechki payt uyimizga keldi. Bizdan hol-ahvol so‘rab, xotinimning to‘shakka mixlanib qolish sababi bilan qiziqdi. Men xotinim yiqilib tushib, ilik suyagini sindirganini va to‘rt yildan beri yurolmay, yotib qolganini aytdim. Shunda hokim xotinim oyoqqa turib ketishi uchun qanday yordam kerakligni so‘radi. Men operatsiyaga 3 ming dollar kerakligini aytib, sharoitimiz yetmayotganini bildirdim. Shunda hokim buva operatsiyaga tayyorgarlik ko‘rishimiz lozimligini, topolmay turgan 2 ming dollarni homiylar ko‘magida o‘zi topib berishini aytdi. O‘sha kundan beri xotinim judayam xursand, oyoqqa turishiga umid qilyapti”, — deydi Sherali Donayev.
Qo‘shimcha qilinishicha, tuman hokimi olis qishloqda tunab qolgan kuni tumandagi barcha tashkilot rahbarlari ham hududda bo‘lib, “ayollar daftari”, “yoshlar daftari”ga kiritilgan oilalar holidan xabar olgan va ularni qiynab kelayotgan muammolarga yechim topgan.
Mavzuga doir:
- “Avval bo‘sh vaqtimiz bo‘lmagani sababmi, dastlabki to‘rt kunda zerikkandek bo‘ldik”. Ta’tilga chiqqan qashqadaryolik hokimlar ta’til qanday o‘tayotgani haqida
- “Odamlardan 35 mln qarzim bor, hokimiyat to‘lab bersin”. Dehqonobodlik ayol tuman hokimiga talab qo‘ydi va ijtimoiy tarmoq “qahramoni”ga aylandi