Qashqadaryo viloyatining Shahrisabz tumani hokimi Samad Hasanov hokimligi va prokuratura organining zaxira kadri sifatidagi ishiga 10 million so‘mdan oshiq maosh olishini ochiqladi. Bu haqda hokimning jurnalist va blogerlar bilan muloqotida ma’lum qilindi, deya xabar berdi “Daryo” muxbiri.
Ta’kidlanishicha, 2021-yilning 29-iyul kuni Shahrisabz tumani hokimligi tashabbusi bilan tumanning Miraki qishlog‘ida viloyatda faoliyat yurituvchi jurnalist va blogerlar uchun press-tur tashkil etilgan.
Press-tur davomida tashkil etilgan matbuot anjumanida hokim Samad Hasanov jurnalist va blogerlarni qiziqtirgan savollarga javob bergan.
Muloqotda “Daryo” muxbiri hokimning prokuratura tizimidan chiqqanini va ayni kunda ham prokuratura tizimining zaxira kadri hamda hokim sifatida qancha maosh olishi, hokimlik faoliyati davomida necha marotaba jazolangani bilan qiziqdi.
“Faoliyatimga bir yil bo‘ldi. Hozircha jazolanganim yo‘q. Ammo rahbar mening kamchiligimni ko‘rib, tanbeh bersa yoki jazolasa, bu mening ertaga xulosa qilishimga sabab bo‘ldi. Shuningdek, davlat rahbarining selektor yig‘ilishlarida yoki viloyat hokimining oddiy kundalik yig‘ilishida ham Shahrisabz tumaniga yoki mening faoliyatimga e’tiroz bo‘lsa, bu — men uchun jazo bo‘ladi. Eng yomoni aholi mening faoliyatimdan qoniqmasa yoki murojaatiga o‘z vaqtida javob bermaganim uchun e’tiroz bildirsa, bu yanayam og‘ir jazo”, — dedi tuman hokimi.
Hokimning ma’lumot berishicha, u prokuratura tizimida 17 yil faoliyat yuritgan.
“Prokuror sifatida 17 yil faoliyat yuritib, rasman bir marotaba jazolanganman. Ammo ko‘pchilik singari og‘zaki tanbeh va ogohlantirishlar ham olganmiz”, — deydi Samad Hasanov.
Shahrisabz hokimi savolga javoban maoshi haqida ham to‘xtalib o‘tgan.
“Prokuratura zaxira kadri sifatida, shuningdek, hokim sifatida Vazirlar Mahkamasining qo‘shimcha oyligi bilan 10 million so‘mdan oshiqroq maosh olaman. Shukrki, maoshimiz yaxshi va bugungi kundagi oilaviy ehtiyojlarimizga yetarli. Ammo shu maoshni oqlayapmizmi imkon qadar mas’uliyatli bo‘lishga, budjet pullarini oqlashga harakat qilyapmiz. Bunga endi ko‘proq xalq baho beradi”, — dedi tuman hokimi jurnalist va blogerlar bilan muloqotda.
Izoh (0)