AQSh va Rossiya vakillari strategik barqarorlik bo‘yicha Rossiya—Amerika maslahatlashuvlari doirasida o‘zaro muloqotlarni davom ettirdi. Ushbu mavzu bo‘yicha muzokaralarning navbatdagi raundi 28-iyul, chorshanba kuni Jenevada bo‘lib o‘tdi.
AQSh Davlat departamentidan ma’lum qilinishicha, muzokaralar “professional va mazmunli” o‘tgan.
“Ikki delegatsiya sentabr oyi oxirida bo‘lib o‘tadigan yalpi majlisda qayta uchrashishga va ungacha ikkinchi yalpi majlisda ekspert ishchi guruhlari uchun mavzularni aniqlash maqsadida norasmiy maslahatlashuvlar o‘tkazishga kelishib oldi”, — deyiladi xabarda.
O‘z navbatida, Rossiya tashqi ishlar vazirining o‘rinbosari Sergey Ryabkov ham Jenevadagi uchrashuv natijalarini ijobiy baholadi, deb yozadi “TASS”.
“Uchrashuv taassurotlari haqida gapirganda, men 16-iyun kuni bo‘lib o‘tgan Jeneva sammiti yakunlari bo‘yicha bayonotdan iqtibos keltirib ta’riflagan holda, uni o‘ta vazmin, o‘ta ishchan, o‘ta diqqatli, ongli va sog‘lom o‘tdi, deya olaman”, — dedi Ryabkov.
Uning so‘zlariga ko‘ra, uchrashuvning asosiy mavzularidan biri “qurollarni nazorat qilish sohasida ochiq-oydin rivojlangan” inqirozli vaziyatni tomonlar qanday bartaraf etishi mumkinligi haqida bo‘lgan.
“Biz bu savolga javobni ishlab chiqa olmadik, bu juda qiyin. Bu masala juda uzoq vaqtdan beri e’tibordan chetda qolgan, hozir esa biz aynan nima qilishimiz va ishlarni qanday davom ettirishimiz kerakligi to‘g‘risida fikr almashish jarayonining boshida turibmiz”, — dedi vazir o‘rinbosari.
Shu bilan birga, Ryabkovning ta’kidlashicha, AQSh Rossiya bilan konstruktiv muloqotga tayyorligini namoyish etgan.
16-iyun kuni Vladimir Putin va Jo Bayden Jenevada Rossiya va Amerika prezidentlari sifatida birinchi marta uchrashuv o‘tkazgandi. Sammit bir necha soat davom etgan, shundan keyin prezidentlar galma-galdan alohida-alohida matbuot anjumanlari o‘tkazgan. Uchrashuv davomida prezidentlar bir-biriga sovg‘a bergan.
Keyinroq Bayden va Putin telefon orqali suhbatlashdi.
Izoh (0)