Armaniston Mudofaa vazirligi Ozarbayjon Qurolli Kuchlari 29-iyulga o‘tar kechasi o‘t ochishni to‘xtatish rejimini buzib, Armaniston kuchlari pozitsiyalarini o‘qqa tuta boshlaganini ma’lum qildi. Armaniston harbiylari ularga javoban o‘t ochgan, deb yozadi “RBK”.
“29-iyul, tungi soat uchlarda Armaniston—Ozarbayjon chegarasining Karvachar yo‘nalishidagi Gegarkunik qismida Ozarbayjon Qurolli Kuchlari bo‘linmalari bir kun oldin erishilgan sulh bitimini buzgancha, yana arman pozitsiyalariga o‘q uza boshladi”, — deyiladi xabarda.
Ozarbayjon o‘z navbatida, qarshi ayblovlarni ilgari surmoqda va Armanistonni sulh shartlarini “qo‘pol ravishda buzganlikda” ayblamoqda.
“29-iyul kuni soat 02:45 dan 03:40 gacha Armaniston Qurolli Kuchlarining Basarkechar tumani Yuxar Sho‘rja qishlog‘i yo‘nalishidagi pozitsiyalari Ozarbayjon armiyasining Kelbajar tumani Zeylik qishlog‘idagi pozitsiyalarini avtomat va granatamyotlardan o‘qqa tutdi. Bizning pozitsiyalarimiz tomonga 10—12 ta F-1 qo‘l granatalari ham tashlandi”, — deyiladi Ozarbayjon Mudofaa vazirligi xabarida.
Armaniston va Ozarbayjon chegarasidagi ziddiyat 28-iyulda yangidan avj oldi. Yerevan Ozarbayjon kuchlari to‘laqonli jangovar harakatlar boshlagani haqida, Boku esa Armaniston tomonidan o‘q uzilgani haqida xabar berdi. Yerevan xabariga ko‘ra, otishmada uch kishi halok bo‘lgan, to‘rt kishi yaralangan. Boku ikki yarador haqida ma’lum qildi.
O‘sha kuni ertalab ikki davlat o‘rtasida sulh e’lon qilingandi, kelishuvga Rossiya tinchlikparvarlari vositachiligi bilan erishilgan. Armaniston—Ozarbayjon chegarasidagi vaziyat Rossiya prezidenti Vladimir Putin raisligida Rossiya Xavfsizlik Kengashining tezkor yig‘ilishida bosh mavzu bo‘ldi, deya xabar qildi prezident matbuot kotibi Dmitriy Peskov.
2020-yil kuzida Tog‘li Qorabog‘ atrofida kuzatilgan Armaniston hamda Ozarbayjon harbiylarining qurolli to‘qnashuvlaridan keyin Tog‘li Qorabog‘ga qarshi yettita tuman Boku ixtiyoriga o‘tgan Syuniksk va Gegarkun viloyatlari armanlarning ozarbayjonlar bilan chegara hududi deb hisoblana boshlangan. Vaziyat 2021-yil 12-mayda yana keskinlashgan. Shundan buyon ikki tomon yangi qurolli to‘qnashuvlar, ko‘ngilsiz hodisalar sodir bo‘layotgani haqida xabar berib turibdi.
16-iyul kuni Ozarbayjon Mudofaa vazirligi Armaniston hududidan mamlakat Qurolli Kuchlarining pozitsiyasiga o‘t ochilganini va mazkur harakatga javob qaytarilganini ma’lum qildi. Shuningdek, Ozarbayjon prezidenti Ilhom Aliyev Armanistonga tinchlik shartnomasi imzolashni yana bir bor taklif qilgani haqida xabar berildi.
Izoh (0)