Sankt-Peterburgda politsiya Checheniston va Tojikiston fuqarolari ishtirokida sodir etilgan ommaviy mushtlashuv tafsilotlarini o‘rganmoqda, deb xabar berdi “Interfaks”.
Xabarga ko‘ra, 28-iyul, chorshanba kuni kechqurun Bolsheviklar prospektidagi “Beliye nochi” mehmonxonasida olti nafar chechenistonlik va to‘rt tojikistonlik o‘rtasida maishiy xususiyatga ega mojaro chiqqani haqida xabar kelib tushgan. Mojaro mehmonxonaning birinchi qavatida boshlangan, so‘ng hisobni davom ettirish uchun ishtirokchilar ko‘chaga chiqqan.
To‘qnashuv oqibatida 23 yoshli Checheniston fuqarosi miya chayqalishi bilan Marinskiy kasalxonasiga yotqizildi, keyinroq yana bir chechenistonlik Janelidze nomidagi tez yordam ilmiy tadqiqot institutiga yuborildi.
Voqea joyida to‘qnashuvning to‘qqiz ishtirokchisi hibsga olingan. Shuningdek, yana 70 ga yaqin Tojikiston va O‘zbekiston fuqarolari voqeaning barcha tafsilotlarini aniqlashtirish hamda ularning Rossiya hududida bo‘lishi qonuniy ekanini tekshirish uchun qo‘lga olingan.
Ichki ishlar vazirligining Sankt-Peterburg va Leningrad viloyati bo‘yicha bosh boshqarmasi matbuot xizmati hozirda politsiya janjalning kelib chiqish sabablarini o‘rganayotgani haqida xabar qildi. Jinoyat ishi qo‘zg‘atish masalasi ham muhokama qilinmoqda.
Avvalroq Rossiya Ichki ishlar vazirligi Rossiya hududida ommaviy mushtlashuvlarda qatnashadigan chet elliklar mamlakatdan chiqarib yuborilishi haqida e’lon qilgandi.
“Sodir etilgan xatti-harakatlarning jamoat xavfsizligiga zararini hisobga olgan holda, ushbu xorijiy fuqarolarning Rossiyaga kirishiga ruxsat berilmaslik to‘g‘risida qaror qabul qilindi. Agar ular Rossiya Federatsiyasi hududidan o‘zlari chiqib ketmasa, ularni deportatsiya qilish choralari ko‘riladi”, — deyiladi xabarda.
Eslatib o‘tamiz, 12-iyul kuni Moskvaning “Kuzminki” metro bekati yaqinida 180 dan ortiq kishi ishtirokida ommaviy mushtlashuv sodir etilgandi. Dastlab mojaro O‘zbekiston va Qirg‘iziston fuqarolari o‘rtasida chiqqani aytilgan. O‘zbekiston Tashqi migratsiya agentligi Rossiya Ichki ishlar vazirligi xodimlari bilan muloqotda bo‘lib, vaziyatni o‘rgandi va mojaroda o‘zbekistonliklar ishtirok etmaganini ma’lum qildi.
Mushtlashuv Tojikiston va Qirg‘iziston fuqarolari o‘rtasida yuz bergan. Janjal ishtirokchilari sud qarori bilan Rossiyadan chiqarib yuborilishi xabar qilindi.
Undan avval Moskvadagi kafeda Qirg‘iziston va Tojikiston fuqarolari o‘rtasida ommaviy mushtlashuv bo‘lib o‘tgandi.
Izoh (0)