Rossiya Afg‘onistondagi hokimiyat “Tolibon” jangarilari tomonidan to‘liq egallab olinishi ssenariysiga tayyor, ammo voqealarning bunday rivojlanishini haqiqatdan yiroq deb hisoblaydi. Bu haqda Rossiya Tashqi ishlar vazirligining Ikkinchi Osiyo departamenti direktori Zamir Kabulov aytib o‘tdi.
“Avvalambor, biz ushbu ssenariy ishlamaydi degan fikrdamiz, ammo har xil ssenariylarga tayyormiz. Turli xil variantlarni ko‘rib chiqdik va tahlil qildik, demak, biz bunga tayyormiz ”, — deydi Kobulov matbuot anjumanida Afg‘onistondagi vaziyatga izoh berib.
Uning qo‘shimcha qilishicha, nima bo‘lgan taqdirda ham Afg‘oniston hududining yarmidan ko‘pi “Tolibon” nazorati ostida. Hozirda “Tolibon” 417 tumanning 200 dan ortig‘ini nazorat qilmoqda, dedi Kabulov avvalroq AQSh e’lon qilgan hisob-kitoblarga asoslanib. Uning so‘zlariga ko‘ra, Afg‘oniston hukumat kuchlari so‘nggi bir hafta ichida 30 ta tumanni qaytarib olganini ma’lum qilgan.
“Tolibon”ning o‘zi Afg‘oniston hududining 85 foizini va chegaralarining 90 foizini nazoratga olganini da’vo qilgan. Afg‘oniston Mudofaa vazirligi vakili o‘rinbosari Favad Aman ushbu ma’lumotlarini rad etgan. Favad Amanning ma’lum qilishicha, Afg‘oniston hukumat kuchlari “Tolibon” jangarilarini G‘arbiy Hirot viloyatining Karux tumanidan quvib chiqargan.
Avvalroq “Tolibon” Afg‘onistonda prezident Ashraf G‘ani boshchiligidagi Vazirlar Mahkamasi iste’foga chiqsa va muzokaralar yo‘li bilan yangi hukumat tuzilsagina, sulh tuzishga tayyorligini bildirgandi.
Izoh (0)