АҚШ ва Россия вакиллари стратегик барқарорлик бўйича Россия—Америка маслаҳатлашувлари доирасида ўзаро мулоқотларни давом эттирди. Ушбу мавзу бўйича музокараларнинг навбатдаги раунди 28 июль, чоршанба куни Женевада бўлиб ўтди.
АҚШ Давлат департаментидан маълум қилинишича, музокаралар «профессионал ва мазмунли» ўтган.
«Икки делегация сентябрь ойи охирида бўлиб ўтадиган ялпи мажлисда қайта учрашишга ва унгача иккинчи ялпи мажлисда эксперт ишчи гуруҳлари учун мавзуларни аниқлаш мақсадида норасмий маслаҳатлашувлар ўтказишга келишиб олди», — дейилади хабарда.
Ўз навбатида, Россия ташқи ишлар вазирининг ўринбосари Сергей Рябков ҳам Женевадаги учрашув натижаларини ижобий баҳолади, деб ёзади «ТАСС».
«Учрашув таассуротлари ҳақида гапирганда, мен 16 июнь куни бўлиб ўтган Женева саммити якунлари бўйича баёнотдан иқтибос келтириб таърифлаган ҳолда, уни ўта вазмин, ўта ишчан, ўта диққатли, онгли ва соғлом ўтди, дея оламан», — деди Рябков.
Унинг сўзларига кўра, учрашувнинг асосий мавзуларидан бири «қуролларни назорат қилиш соҳасида очиқ-ойдин ривожланган» инқирозли вазиятни томонлар қандай бартараф этиши мумкинлиги ҳақида бўлган.
«Биз бу саволга жавобни ишлаб чиқа олмадик, бу жуда қийин. Бу масала жуда узоқ вақтдан бери эътибордан четда қолган, ҳозир эса биз айнан нима қилишимиз ва ишларни қандай давом эттиришимиз кераклиги тўғрисида фикр алмашиш жараёнининг бошида турибмиз», — деди вазир ўринбосари.
Шу билан бирга, Рябковнинг таъкидлашича, АҚШ Россия билан конструктив мулоқотга тайёрлигини намойиш этган.
16 июнь куни Владимир Путин ва Жо Байден Женевада Россия ва Америка президентлари сифатида биринчи марта учрашув ўтказганди. Саммит бир неча соат давом этган, шундан кейин президентлар галма-галдан алоҳида-алоҳида матбуот анжуманлари ўтказган. Учрашув давомида президентлар бир-бирига совға берган.
Кейинроқ Байден ва Путин телефон орқали суҳбатлашди.
Изоҳ (0)