Uch nafar amerikalik AQShning 48 ta shtatini 3 kun 14 soat-u 19 daqiqada bosib o‘tib, yangi rekord o‘rnatdi. Rekord 2012-yilda ishlab chiqarilgan Mercedes-Benz S550 mashinasida o‘rnatilgan. Safar ishtirokchilaridan birining so‘zlariga ko‘ra, muvaffaqiyatga erishishda barcha yo‘llarda maksimal tezlikda harakatlanish emas, balki marshrutni to‘g‘ri rejalashtirish yordam bergan, deb yozadi Motor.
Safar ishtirokchilaridan biri bo‘lgan Grudi Leno Road&Track nashriga bergan intervyusida marshrutni yaxshilab tuzib chiqish va harakat tezligi nuqtayi nazaridan optimal yechimni topishga u 60 soatdan ortiq vaqt sarflagan. Vaqtni optimallashtirish maqsadida ekipaj ayrim shtatlarni yo‘l-yo‘lakay bosib o‘tgan: masalan, Florida hududiga ular bir necha metr kirgan, xolos.
Uyquning to‘g‘ri grafigi sabab ekipajning har bir a’zosi yetarlicha uxlab olgan va rulni tetik holda boshqargan, bu esa harakat tezligiga sezilarli darajada ta’sir ko‘rsatgan. Haydovchilardan biri doim uyquda bo‘lgan va u hatto tirbandliklarda ham uyg‘otilmagan, ular har to‘rt soatda o‘zaro almashgan. Bu kabi grafik yordamida haydovchilar uzoq masofaga yurishda ham toliqmagan va diqqatini yo‘qotmagan.
Safar davomida 10 750 kilometr yo‘l bosilgan va o‘rtacha tezlik soatiga 125 kilometrni tashkil etgan. Ular ushbu masofani bosib o‘tishga 3 kun 14 soat-u 19 daqiqa sarflagan. Bundan oldingi rekord natijasi 8 soatga ko‘proq edi.
Rekordni o‘rnatishga tayyorgarlik ko‘rish jarayonida ular butun Amerika bo‘ylab o‘tkaziladigan noqonuniy poygada ishtirok etgan. U Nyu-Yorkdan boshlanib, Los-Anjelesda tugaydi. Rekordchilar uchligi ushbu poygada 36 soatli natijani ko‘rsatgan, rekord esa 25 soat-u 39 daqiqani tashkil etadi.
Izoh (0)