Porsche Taycan noqonuniy Cannonball Run poygasida yangi rekordni o‘rnatishga muvaffaq bo‘ldi. InsideEV nashri jurnalisti Kayl Konner ikki nafar do‘sti bilan elektrokar yordamida butun AQSh hududini 44 soat 25 daqiqa va 59 soniyada bosib o‘tdi. Elektrokarlar orasidagi bundan oldingi rekord Tesla Model 3’ga tegishli edi, deb yozadi Motor.

Foto: The Drive

Nashrning ta’kidlashicha, bu ikkita elektrokar orasidagi tezlik bo‘yicha haqiqiy poyga emas, balki quvvatlantirish stansiyalari o‘rtasidagi jangga aylangan. Jurnalistlar Nyu-Yorkdan Los-Anjelesgacha sayohat qilish uchun 2020-yilda ishlab chiqarilgan eng katta batareya sig‘imiga, aerodinamik g‘ildirak diskalari va o‘rindiqlarda massaj funksiyasiga ega Porsche Taycan 4S’dan foydalangan.

Bu kabi Taycan bir marta quvvatlanish orqali 460 kilometr yo‘l bosa oladi, bosib o‘tilgan masofa esa 4,5 ming kilometrni tashkil etadi. Jurnalistlar quvvatlantirish stansiyalarga bog‘liq holda minimal darajada to‘xtashlarni hisobga olib, marshrutni puxta rejalashtirgan. Natijada poyga Electrify America va Supercharger — Tesla quvvatlantirgichlari o‘rtasidagi bellashuvga aylanib ketgan.

Foto: The Drive

Shuningdek, eng yuqori quvvati 270 kilovattga teng Taycan batareyasi ham sinovdan o‘tgan. Biroq Konner biror marta ham bu kabi ko‘rsatkichga erisha olmagan: aksariyat hollarda u 250 kilovattni, faqat bir marotaba 260 kilovattni tashkil etgan. Poyga ishtirokchilari buni dasturiy ta’minotdagi nosozliklar bilan izohlagan.

Cannonball Run’ning bundan oldingi rekordi Tesla Model 3’ga tegishli bo‘lib, u 2019-yilning avgustida o‘rnatilgan — 45 soatu 16 daqiqa.

Eslatib o‘tamiz, 2020-yilning avgustida amerikalik Dag Tabbatt, Arne Toman va Berkli Chedvik AQShning bir chekkasidan ikkinchisiga 25 soat 39 daqiqada yetib borgan edi. Ular Audi A6 yordamida o‘tgan yilgi noqonuniy Cannonball Run poygasidagi rekordni qaytarishga muvaffaq bo‘lgan.