“Tolibon” harakati Afg‘oniston va Pokiston chegarasida, Qandahor yaqinida joylashgan Spin-Boldak nazorat-o‘tkazish punktini egallab olgan bo‘lishi mumkin, deb yozadi Meduza BBC News’ga tayanib.
Ijtimoiy tarmoqlarda tarqalgan videoyozuvga ko‘ra, “Tolibon” jangarilari ikki mamlakat o‘rtasidagi asosiy chegaradan o‘tish joyiga o‘z bayrog‘ini o‘rnatgan. Shuningdek, videoda “Tolibon” vakillari pokistonlik chegarachilar bilan suhbatlashayotganini ko‘rish mumkin.
Afg‘oniston hukumati chegara postining egallab olinganini inkor qilmoqda. Ayni vaqtda Pokiston rasmiy shaxslari BBC News’ga chegaradan o‘tish joyi “Tolibon” jangarilari tomonidan nazorat qilinayotganini tasdiqladi.
So‘nggi bir necha haftdan buyon “Tolibon” harakati a’zolari Afg‘oniston hukumat kuchlari pozitsiyalariga hujum boshlab, ko‘plab hududlarni, shu jumladan, Eron, Tojikiston va Turkmaniston bilan chegaradagi postlarni egallab oldi. Bu Amerika qo‘shinlarining Afg‘onistondan olib chiqilishi fonida yuz bermoqda, qo‘shinlarni olib ketish esa, AQSh prezidenti Jo Baydenning rejasi bo‘yicha 2021-yil 11-sentabrgacha yakunlanishi kerak.
Avvalroq “Tolibon” Tojikiston bilan chegarada o‘z bayrog‘ini o‘rnatgan edi. Ular 8-iyul kuni Tojikiston bilan chegaradosh Panj daryosidagi ko‘prikda o‘z bayrog‘ini ko‘tardi. 5-iyulga o‘tar kechasi hujumga o‘tgan “Tolibon”ga afg‘on chegarachilari nazorat punktini jangsiz topshirgan. Ushbu ko‘prik orqali 312 nafar chegarachi va harbiy xizmatchilar Tojikiston hududiga o‘tishga muvaffaq bo‘lgan.
Izoh (0)