Afg‘onistonning Badaxshon viloyati Vaxon tumanida yashovchi 77 nafar fuqaro “Tolibon”ning ta’qibidan qochib, Tojikiston hududiga o‘tdi. Bu haqda Tojikiston Milliy xavfsizlik davlat qo‘mitasi chegara qo‘shinlari matbuot markaziga tayanib, “Interfaks” xabar berdi.
“13-iyul kuni mahalliy vaqt bilan soat 16:00 da Afg‘oniston Respublikasi fuqarolari bo‘lgan 77 kishi, xususan, 26 nafar erkak, 20 nafar ayol va 31 nafar voyaga yetmaganlar Tojikistonga keldi. Asosan, Badaxshon viloyatining Vaxon tumanidagi Andemin qirg‘iz qishlog‘i aholisi bo‘lgan ushbu kishilar, “Tolibon” ta’qibidan qo‘rqib va o‘z hayotlarini saqlab qolish uchun Tojikistonning Murg‘ob viloyati, Qizilrabot qishlog‘idagi davlat chegarasini kesib o‘tgan”, — deyiladi xabarda.
Tojikiston chegarachilari afg‘on qochqinlarini “insonparvarlik sabablari bilan” Tojikistonga kiritishga ruxsat bergan. Hozir ular Murg‘ob viloyati Qizilrabot jamoatining Andemin va Cheshteba tumanlarida.
Afg‘oniston birinchi vitse-prezidenti Amrulla Solih Badaxshon viloyati aholisining qo‘shni Tojikistonga qochib ketishiga izoh berar ekan, “Tolibon’ Badaxshon Pomiridan o‘nlab oilalarni quvib chiqargan” dedi.
“Tolibon’ ularni islom dinini qabul qilishga yoki ketishga majbur qilmoqda. Bu aholi asrlar davomida shu yerda yashab, qiyinchiliklardan omon qolgan va hududni tark etmagan qirg‘izlardir. Endi ular o‘z taqdirlarini kutib, Tojikistonda o‘tiribdi”, — deb yozgan Solih ijtimoiy tarmoqda.
Oxirgi ikki hafta ichida, taxminan, 1500 ming nafar Afg‘oniston harbiylari “Tolibon” vakillari bilan harbiy to‘qnashuvlardan keyin Tojikiston hududiga qochib o‘tgan edi.
Ma’lumotlarga ko‘ra, ayni vaqtda “Tolibon” mamlakatning 370 ta hududidan 110 tasini o‘z nazoratiga olgan. Afg‘oniston hukumati qo‘shinlarining harbiylar guruhi “Tolibon” bilan keskin to‘qnashuvlardan keyin Tojikiston va O‘zbekiston hududiga qochib o‘tmoqda. 5-iyul kuni Emomali Rahmon tojik-afg‘on chegarasini mustahkamlash uchun armiya rezervidagi 20 ming nafar harbiy xizmatchini safarbar etgan.
Avval Rossiya Afg‘onistondagi vaziyat tufayli Tojikistondagi harbiy bazasidan foydalanishga tayyorligi, Turkmaniston Afg‘oniston bilan chegara hududidagi harbiy safarbarlikni kuchaytirishi, Putin afg‘on-tojik chegarasidagi vaziyatning keskinlashuvi munosabati bilan Tojikistonga yordam berishni va’da qilgani haqida xabarlar berilgan.
Izoh (0)