Birlashgan Arab Amirliklari 14-iyul kuni Isroildagi Tel-Aviv shahrida o‘z elchixonasini rasman ochdi. Bu haqda Associated Press xabar berdi.
BAAning Isroildagi elchisi Muhammad al-Xajaning jurnalistlarga aytishicha, elchixona “yangi hamkorlikni yanada rivojlantirish, nizolarga emas, balki muloqotga intilish, yangi tinchlik paradigmasini yaratish va Yaqin Sharqdagi nizolarni hal qilishda yangi qo‘shma yondashuvni ta’minlash vazifalarini amalga oshirish uchun asos bo‘ladi”.
Elchixonaning ochilish marosimida so‘zga chiqqan Isroil prezidenti Isxak Gersog elchixonaning ochilishi “Yaqin Sharqda tinchlik, farovonlik va xavfsizlikni ta’minlash yo‘lidagi muhim bosqich” ekanini ta’kidladi.
BAA elchixonasi Tel-Avivning biznes tumani markazidagi Isroil fond birjasi joylashgan binoda ochildi.
2021-yilning iyun oyi oxirida Abu-Dabida Isroil elchixonasi ochilgandi. Ochilish marosimida Isroil tashqi ishlar vaziri Yair Lapid ishtirok etdi. Isroil 2020-yil sentabr oyida AQSh vositachiligida BAA bilan diplomatik aloqalarni o‘rnatgan.
Mart oyida tarixda birinchi marta BAA elchisi Isroilning Tel-Aviv shahriga tashrif buyurgandi.
Izoh (0)