Moskvadagi ommaviy mushtlashuv Tojikiston va Qirg‘iziston fuqarolari o‘rtasida yuz bergan. Ular Rossiyadan deportatsiya qilinadi

Moskvaning “Kuzminki” metro bekati yaqinida 180 dan ortiq kishi ishtirokida sodir etilgan ommaviy mushtlashuv Tojikiston va Qirg‘iziston fuqarolari o‘rtasida kelib chiqqan. Bu haqda “REN TV” telekanali xabar berdi.

Telekanal ma’lumotlariga ko‘ra, ushbu mushtlashuvdan avval Moskvada mehnat muhojirlari o‘rtasida ikki marta to‘qnashuv bo‘lib o‘tgan. Xususan, voqeadan sal oldin Podmoskvyedagi Ximki shahrida janjal kelib chiqqan. U yerda Tojikiston fuqarolari Markaziy Osiyo respublikalaridan kelgan bir necha kishini kaltaklagan. Keyinchalik 11-iyul kuni yana bir mojaro yuz bergan, unda Tojikistondan kelgan muhojirlar Qirg‘izistonning uch nafar fuqarosini kaltaklagan. Uchalasi ham kasalxonaga yotqizilgan.

O‘z navbatida Butunrossiya Qirg‘iziston Kongressining Moskva hududi bo‘limi rahbari Marsel Salaxunov “Kuzminki” yaqinidagi ommaviy mushtlashuvdan oldin yana bir mojaro sodir etilganini tasdiqladi.

Uning ta’kidlashicha, mojaro sof maishiy xususiyatga ega bo‘lgan. Yigitlar bilyard o‘ynab, bir-biri bilan nimanidir kelisha olmagan.

Salaxunovning qo‘shimcha qilishicha, qirg‘iz va tojik diasporalari vakillari respublikalar aholisini tinchlik saqlashga chaqiruvchi qo‘shma bayonot berishni rejalashtirmoqda.

Dastlab janjal O‘zbekiston va Qirg‘iziston fuqarolari o‘rtasida chiqqani aytilgandi. O‘zbekiston Tashqi migratsiya agentligi Rossiya Ichki ishlar vazirligi xodimlari bilan muloqotda bo‘lib, vaziyatni o‘rgandi va mojaroda o‘zbekistonliklar ishtirok etmaganini ma’lum qildi.

Rossiya Ichki ishlar vazirligining Moskvadagi bosh boshqarmasi xabar berishicha, “Kuzminki” metrosi yaqinidagi janjal ishtirokchilari sud qarori bilan Rossiyadan chiqarib yuboriladi.

“Ushbu chet el fuqarolariga sud qarori bilan ma’muriy jarima solish bilan birga ular Rossiya Federatsiyasi hududidan chiqarib yuboriladi. Shuningdek, bir qator shaxslarga nisbatan Rossiya Federatsiyasi hududiga kirishga ruxsat bermaslik to‘g‘risida qaror qabul qilinadi”, — deyiladi xabarda.

Xabarda qayd etilishicha, janjaldan so‘ng mojaroda qatnashgan 103 kishi hududiy politsiya bo‘limlariga olib ketilgan. Hibsga olinganlarga nisbatan Rossiyada bo‘lish rejimining buzilishi, mayda bezorilik, yig‘ilish, miting, namoyish, yurish yoki piket tashkil etish yoki o‘tkazish tartibining buzilishi sabablari bilan bayonnomalar tuzilgan.

Shuningdek, mushtlashuvdan so‘ng politsiya Rossiya Jinoyat kodeksining 213-moddasi (bezorilik) bo‘yicha jinoiy ish qo‘zg‘agan. Ushbu modda bo‘yicha jinoyat 1 million rubl (143, 4 million so‘m)gacha jarima yoki besh yilgacha majburiy mehnat yoki yetti yilgacha ozodlikdan mahrum qilish bilan jazolanadi.

“Hozirda politsiya xodimlari voqeaning barcha tafsilotlarini aniqlash uchun tekshiruv o‘tkazmoqda. Uning natijalari bo‘yicha qonun hujjatlariga muvofiq qaror qabul qilinadi”, — deyiladi xabarda.