OAV: Afg‘oniston hukumati vakillari Dohada “Tolibon” bilan muzokara o‘tkazadi

Afg‘oniston sobiq prezidenti Hamid Karzay va Afg‘oniston Milliy yarashish bo‘yicha oliy kengashi raisi Abdulla Abdulla 16-iyul kuni Qatar poytaxti Dohaga borib, “Tolibon” delegatsiyasi bilan muzokaralar o‘tkazadi. Bu haqda Afg‘onistonning Pajhwok agentligiga tayanib, “TASS” xabar berdi.

Avvalroq Hamid Karzay Kobuldagi matbuot anjumanida yaqin orada mamlakat hukumati va “Tolibon” o‘rtasida tinchlik muzokaralari boshlanishi haqida aytgan edi. Abdulla Abdulla ham xuddi shunday bayonot bilan Afg‘oniston hukumati tinchlik muzokaralariga tayyorligini ta’kidlagan.

O‘tgan hafta Tehronda Qatardan kelgan “Tolibon” delegatsiyasi, Kobuldagi hukumatga yaqin afg‘on siyosatchilari guruhi va Eron Tashqi ishlar vazirligi rahbariyati ishtirokida uch tomonlama uchrashuv bo‘lib o‘tdi. Afg‘oniston rasmiylari va “Tolibon” 2020-yilning 12 sentabridan beri Qatar poytaxtida Afg‘onistonda tinchlikni tiklash bo‘yicha muloqot olib borayotgan edi. Biroq 2012-yil boshidan beri muzokaralar to‘xtab qoldi va aprel oyining o‘rtalariga kelib ular boshi berk ko‘chaga kirib qoldi.

Afg‘oniston hukumati kuchlari va “Tolibon” o‘rtasidagi to‘qnashuvlar AQSh o‘z qo‘shinlarini Afg‘onistondan olib chiqishni boshlagach kuchaydi.

Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak. So‘nggi ma’lumotlarga ko‘ra, AQSh Afg‘onistondagi harbiy kontingentining 90 foizdan ko‘prog‘ini olib chiqib ketdi.

Avvalroq “Tolibon” barcha chet el qo‘shinlari Afg‘onistonni o‘z muddatida tark etishini talab qilgani haqida xabar berilgandi. AQSh Afg‘onistondan o‘z qo‘shinlarini olib chiqish amaliyoti avgust oxiriga qadar tugashini ma’lum qildi.

Bugunga qadar Germaniya, Italiya va Avstraliya Afg‘onistondan o‘z qo‘shinlarini olib chiqishni yakunladi.