Sirdaryoda Damas’ga urilgan Isuzu yuk mashinasi ag‘darilib, undagi kolbasa mahsulotlari yerga sochildi

Sirdaryo viloyatida Damas va Isuzu yuk mashinasi ishtirokida YTH yuz berib, har ikki mashina ag‘darildi. Bu haqda YHXBB matbuot xizmati xabar berdi.

Ma’lum bo‘lishicha, holat 15-iyul kuni soat 13:00 larda viloyatning Sirdaryo tumani hududidan o‘tuvchi M-34 avtomobil yo‘lining 34-kilometrida yuz bergan. Sirdaryo—Guliston yo‘nalishi bo‘ylab harakatlanib kelgan Damas ortga qayrilib olayotganida ortidan bir yo‘nalishda harakatlanib kelgan Isuzu yuk mashinasi urib yuborishi oqibatida qarama-qarshi tomoniga chiqib ketib ag‘darilgan.

Isuzu yuk mashinasi yo‘lning o‘ng tomoniga ag‘darilgan vaqtda shu yo‘nalishdan harakatlanib kelayotgan Nexia haydovchisi rul boshqaruvini yo‘qotib, yo‘l chetidagi temir to‘siqqa urilib YTH sodir etgan.

To‘qnashuv oqibatida hech kim tan jarohati olmagan. Transport vositalariga zarar yetgan. Mazkur YTH yuzasidan Sirdaryo IIB YHXB tomonidan surishtiruv harakatlari olib borilmoqda.

Avvalroq Sirdaryoda Nexia-3, “Jiguli” va Isuzu yuk mashinasi ishtirokida YTH yuz bergandi. To‘qnashuv oqibatida dastlabki ma’lumotlarga ko‘ra 2 nafar fuqaro tan jarohati olgan.