AQSh sobiq prezidenti kichik Jorj Bush Afg‘onistondan Amerika harbiylarining chiqarilishini xato deb atadi. Uning o‘zi 2001-yilning oktabr oyida Afg‘onistonga qo‘shinlarni kiritgandi.
“Men nafaqat AQSh harbiylariga, balki NATO kuchlariga ham yordam bergan tarjimonlar va boshqa odamlar haqida o‘ylayman. Aftidan, ular shunchaki bu shafqatsiz odamlar qo‘lida so‘yilish uchun tashlab qo‘yilmoqda, bu esa yuragimni tirnaydi”, — dedi u. Bushning qo‘shimcha qilishicha, Afg‘oniston ayollari va qizlarini ham jangarilar hukmronligi ostida “behisob azob-uqubatlar” kutmoqda.
AQSh harbiy kuchlari Afg‘onistonda 2001-yildan beri bo‘lib turgandi. Mamlakatdagi missiya 2001-yil 11-sentabrdagi terrorchilik hujumlaridan so‘ng boshlangan. Hujumlar uchun javobgarlikni “Al-Qoida” o‘z zimmasiga olgan. Taxminan 3 ming kishi Nyu-Yorkdagi teraktlar qurboniga aylangan, hujumning asosiy nishoni Jahon savdo markazi va Pentagon bo‘lgan.
Terrorchilik hujumlaridan so‘ng kichik Jorj Bush hujumlarda ishtirok etgan terrorchilarni yo‘q qilishga qaratilgan “Yengilmas ozodlik” operatsiyasini boshlashga buyruq berdi. Afg‘onistondagi urush ushbu operatsiyaning asosiy qismiga aylandi. Pentagonning rasmiy ma’lumotlariga ko‘ra, 2001-yildan 2014-yilgacha rasman davom etgan operatsiyada 2 218 nafar amerikalik harbiy halok bo‘lgan.
Ushbu statistika 2014-yil AQSh armiyasi tomonidan Afg‘oniston hukumatini qo‘llab-quvvatlash bo‘yicha NATOning qo‘shma operatsiyasi e’lon qilingandan beri ko‘rilgan zararlarni o‘z ichiga olmaydi. Qo‘shma Shtatlar jangovar harakatlarni rasman to‘xtatganiga qaramay, Amerika harbiylari “Tolibon” bilan to‘qnashuvlarda ishtirok etishda va terrorchilar pozitsiyalariga zarba berishda davom etdi.
Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak. So‘nggi ma’lumotlarga ko‘ra, AQSh Afg‘onistondagi harbiy kontingentining 90 foizdan ko‘prog‘ini olib chiqib ketdi.
Avvalroq “Tolibon” barcha chet el qo‘shinlari Afg‘onistonni o‘z muddatida tark etishini talab qilgani haqida xabar berilgandi. AQSh Afg‘onistondan o‘z qo‘shinlarini olib chiqish amaliyoti avgust oxiriga qadar tugashini ma’lum qildi.
Associated Press xabariga ko‘ra, AQSh qo‘shinlarining asosiy qismini olib chiqqanidan keyin Afg‘onistonda 650 ga yaqin amerikalik harbiyni qoldirmoqchi. Ta’kidlanishicha, Afg‘onistonda qoladigan harbiylar diplomatlarning xavfsizligini ta’minlaydi.
Bugunga qadar Germaniya, Italiya va Avstraliya Afg‘onistondan o‘z qo‘shinlarini olib chiqishni yakunladi.
Izoh (0)