JSST: Dunyoda COVID-19 pandemiyasining uchinchi to‘lqini boshlandi

Dunyoda koronavirus pandemiyasining uchinchi to‘lqini boshlandi. Bu haqda Jahon sog‘liqni saqlash tashkiloti (JSST) rahbari Tedros Adanam Gebreyesus ma’lum qildi.

JSST rahbarining so‘zlariga ko‘ra, dunyoda COVID-19 bilan kasallanishning so‘nggi o‘sishidan so‘ng Yevropa va Shimoliy Amerikaning o‘z fuqarolarini emlash bo‘yicha harakatlari natija bera boshlagandi, kasallanish va o‘lim holatlari ma’lum muddat pasaygan.

“Afsuski, hozirgi kunda ushbu tendensiyalar o‘zgardi, biz COVID-19 pandemiyasi uchinchi to‘lqinining dastlabki bosqichidamiz”, — dedi u.

Tashkilot rahbarining ta’kidlashicha, dunyo bo‘ylab kasallanish soni ketma-ket to‘rtinchi haftada o‘sib bormoqda, shuningdek, virusdan vafot etayotganlar soni o‘n haftalik pasayishdan so‘ng yana orta boshladi.

Gebreyesus bunday o‘sishga asosiy turtki koronavirusning delta (“hindcha”) shtammi tarqalishi ekanini aytdi. Uning so‘zlariga ko‘ra, odamlar faolligining oshgani, shuningdek, mamlakatlarning sog‘liqni saqlash va aholini himoya qilish sohasidagi chora-tadbirlardan izchil foydalanmayotgani tufayli vaziyat yanada og‘irlashmoqda.

“Delta varianti hozirda 111 dan ortiq mamlakatlarda qayd etilgan, u tez orada COVID-19’ning butun dunyoda aylanib yuradigan ustuvor shtammiga aylanishi kutilmoqda”, — ta’kidladi Gebreyesus.

Shuningdek, u vaksinalarning mamlakatlar bo‘yicha notekis taqsimlanishiga e’tibor qaratdi va buni “hayratda qoldiradigan nomutanosiblik” deb atadi. Uning so‘zlariga ko‘ra, shu sababli dunyoning turli burchaklarida pandemiya ikki xil yo‘l bilan rivojlanmoqda: vaksinalarga ega bo‘lgan mamlakatlar cheklovlarni bekor qilmoqda, ammo emlanmagan guruhlar katta xavf ostida, vaksina olish qiyin bo‘lgan mamlakatlarda aholining aksariyati infeksiyaga qarshi himoyasiz bo‘lib qolmoqda.

“Men sentabrga qadar har bir mamlakat aholisining kamida 10 foizini, shu yil oxirigacha kamida 40 foizini va kelasi yilning o‘rtalariga qadar kamida 70 foizini ommaviy emlashga chaqirdim. Ushbu maqsadlarga erishish uchun bizga 11 milliard doza vaksina kerak bo‘ladi”, — dedi JSST rahbari.