Avgust va sentabr oylarida Rossiya qurolli kuchlari bo‘linmalari O‘zbekiston, Tojikiston va Qirg‘iziston harbiylari bilan qo‘shma mashg‘ulotlar o‘tkazadi. Bu haqda “Izvestiya” Rossiya Mudofaa vazirligidagi manbalarga tayanib xabar berdi.
Nashrning ta’kidlashicha, vazirlik tomonidan tasdiqlangan rejaga ko‘ra, mashg‘ulotlarda asosiy e’tibor noqonuniy qurollangan guruhlarga qarshi kurashga qaratiladi. Bundan tashqari, qo‘shinlar mintaqadagi vaziyatni beqarorlashtirishga qaratilgan urinishlarga qarshi kurash bo‘yicha mashg‘ulotlar o‘taydi.
Mashg‘ulotlar turkumi Shanxay hamkorlik tashkiloti mamlakatlari qurolli kuchlarining “Tinchlik missiyasi-2021” qo‘shma strategik manyovrlari bilan yakunlanadi.
Rossiya tomondan 15-tinchlikparvarlik va 55-tog‘li motorli miltiq brigadalari kuchlari, shuningdek, 31-alohida desant-hujum brigadasining harbiy-havo qismlari jalb qilinadi. Bundan tashqari, manyovrlarda 2 va 24-alohida maxsus maqsadli brigadalar guruhlari, shuningdek, qo‘shma qurolli armiyalar maxsus kuchlarining alohida rota bo‘linmalari ishtirok etadi.
Rossiyaning Qirg‘iziston va Tojikistondagi aviabazalari ham jalb qilinadi. Shuningdek, 201-harbiy bazaning bir qismi bo‘lgan S-300 havo hujumidan mudofaa tizimlari ham mashg‘ulotlarda ishtirok etadi.
Ayni paytda Tojikistonda qo‘mondonlik-shtab mashg‘ulotlari o‘tkazilmoqda. Unda Rossiyaning Tojikistondagi 201-harbiy bazasidan mingga yaqin harbiylar ishtirok etmoqda. O‘quv mashg‘ulotlari hafta oxirigacha davom etadi.
Tojikiston hududidagi 201-harbiy baza Rossiyaning o‘z chegaralaridan tashqaridagi eng yirik harbiy obyekti hisoblanadi. U Dushanbe va Boxtar shaharlarida joylashgan. 2012-yilda ushbu bazaning 2042-yilgacha Tojikistonda qolishi to‘g‘risida qaror qabul qilindi. Uning tarkibiga motorli miltiq, artilleriya, razvedka, zenit-raketa va boshqa qismlar kiradi. 2015-yil sentabr oyidan boshlab tarkibga harbiy havo guruhi ham qo‘shildi. 2020-yilda bazaga 20 ga yaqin yangi va modernizatsiya qilingan uskunalar, jumladan, Mi-8-MTV5-1 tashuvchi jangovar vertolyotlari, piyodalar uchun modernizatsiya qilingan BMP-2M jangovar mashinalari qabul qilindi.
Avvalroq Rossiya Afg‘onistondagi vaziyat tufayli Tojikistondagi harbiy bazasidan foydalanishga tayyorligini bildirgandi.
Mavzuga doir:
- Afg‘onistondagi vaziyatning kuchayishi fonida Rossiya harbiylari Tojikistonda o‘quv mashg‘ulotlarini boshladi
- Emomali Rahmon tojik-afg‘on chegarasini mustahkamlash uchun armiya rezervidagi 20 ming nafar harbiy xizmatchini safarbar etdi
- Putin afg‘on-tojik chegarasidagi vaziyatning keskinlashuvi munosabati bilan Tojikistonga yordam berishni va’da qildi
Izoh (0)