AQSh hukumati iyul oyining so‘nggi haftasida avvalroq AQShga immigratsion vizasini olish uchun murojaat qilganlarni Afg‘onistondan evakuatsiya qilishni boshlaydi. Bu haqda Vashington ma’muriyati vakiliga asoslanib, Reuters xabar berdi.
Pentagon vakili Jon Kirbi ham viza so‘ragan afg‘onistonliklarni AQSh harbiylari iyul oxiridan xavfsiz joylarga yetkazishini tasdiqladi. “AQSh va bizning ittifoqchilarimizga yordam bergan afg‘onistonliklarning birinchi guruhi va ularning oilalarini ushbu oy oxirida havo transporti orqali evakuatsiya qilish boshlanadi”, — dedi u.
Kirbi afg‘onistonliklar aynan qayerga ko‘chirilishini aytmadi, shuningdek, ularning Afg‘oniston hududi bo‘ylab harakatlanishi to‘g‘risida boshqa hech qanday ma’lumot bermadi. Uning so‘zlariga ko‘ra, Vashington ushbu fuqarolarning barchasi Afg‘oniston hududidan xavfsiz ravishda chiqib ketishini istaydi.
O‘tgan hafta AQSh prezidenti Jo Bayden Amerika hukumati shu oy oxirida AQSh kuchlarini qo‘llab-quvvatlagan afg‘onistonlik fuqarolarni aviareyslar yordamida evakuatsiya qilishni boshlashi haqida e’lon qildi. Amerika yetakchisining ta’kidlashicha, rasmiylar AQShdan maxsus immigratsion viza olish uchun murojaat qilib, o‘z mamlakatidan chiqib ketishga qaror qilgan afg‘onlarni va ularning oilalarini ko‘chirish maqsadida iyul oyida havo parvozlarini boshlaydi.
Baydenning so‘zlariga ko‘ra, AQSh “Amerika kuchlari bilan yonma-yon ishlagan, jumladan tarjimonlik qilgan afg‘onlarini olib ketishni” ta’minlash niyatida.
AQSh ommaviy axborot vositalarining xabarlariga ko‘ra, Amerika qo‘shinlariga yordam bergan, shu jumladan tarjimonlik qilgan 18 mingga yaqin afg‘onistonlik va yana ularning 53 ming oila a’zolari AQShdan immigratsion viza olishga umid qilmoqda. Biroq bu juda uzoq jarayon, shuning uchun ularni evakuatsiya qilishga qaror qilingan.
Amerikalik huquq faollari va qonunchilar Bayden ma’muriyatini ushbu afg‘onlarni Tinch okeanidagi AQShga qarashli Guam oroliga jo‘natishga chaqirmoqda. The New York Times gazetasi ilgari yozganidek, Afg‘oniston hududidan evakuatsiya qilish AQSh vizasini olish uchun berilgan arizalarni ko‘rib chiqish jarayonida imtiyoz bermaydi, shuningdek, agar arizalar rad etilsa, bu odamlar o‘z vataniga deportatsiya qilinmasligiga ham kafolat bermaydi.
Avvalroq Bloomberg AQSh prezidenti Jo Bayden ma’muriyati Qozog‘iston, Tojikiston va O‘zbekistondan o‘z hududlariga AQSh Qurolli kuchlari bilan ishlagan 9 mingga yaqin afg‘onlarni vaqtincha joylashtirishni so‘ragani haqida xabar bergan edi. Ayni paytda Qozog‘iston AQShdan afg‘onistonlik qochqinlarni qabul qilish bo‘yicha murojaat kelib tushmaganini bildirdi.
Izoh (0)