АҚШ ҳукумати июль ойининг сўнгги ҳафтасида аввалроқ АҚШга иммиграцион визасини олиш учун мурожаат қилганларни Афғонистондан эвакуация қилишни бошлайди. Бу ҳақда Вашингтон маъмурияти вакилига асосланиб, Reuters хабар берди.
Пентагон вакили Жон Кирби ҳам виза сўраган афғонистонликларни АҚШ ҳарбийлари июль охиридан хавфсиз жойларга етказишини тасдиқлади. «АҚШ ва бизнинг иттифоқчиларимизга ёрдам берган афғонистонликларнинг биринчи гуруҳи ва уларнинг оилаларини ушбу ой охирида ҳаво транспорти орқали эвакуация қилиш бошланади», — деди у.
Кирби афғонистонликлар айнан қаерга кўчирилишини айтмади, шунингдек, уларнинг Афғонистон ҳудуди бўйлаб ҳаракатланиши тўғрисида бошқа ҳеч қандай маълумот бермади. Унинг сўзларига кўра, Вашингтон ушбу фуқароларнинг барчаси Афғонистон ҳудудидан хавфсиз равишда чиқиб кетишини истайди.
Ўтган ҳафта АҚШ президенти Жо Байден Америка ҳукумати шу ой охирида АҚШ кучларини қўллаб-қувватлаган афғонистонлик фуқароларни авиарейслар ёрдамида эвакуация қилишни бошлаши ҳақида эълон қилди. Америка етакчисининг таъкидлашича, расмийлар АҚШдан махсус иммиграцион виза олиш учун мурожаат қилиб, ўз мамлакатидан чиқиб кетишга қарор қилган афғонларни ва уларнинг оилаларини кўчириш мақсадида июль ойида ҳаво парвозларини бошлайди.
Байденнинг сўзларига кўра, АҚШ «Америка кучлари билан ёнма-ён ишлаган, жумладан таржимонлик қилган афғонларини олиб кетишни» таъминлаш ниятида.
АҚШ оммавий ахборот воситаларининг хабарларига кўра, Америка қўшинларига ёрдам берган, шу жумладан таржимонлик қилган 18 мингга яқин афғонистонлик ва яна уларнинг 53 минг оила аъзолари АҚШдан иммиграцион виза олишга умид қилмоқда. Бироқ бу жуда узоқ жараён, шунинг учун уларни эвакуация қилишга қарор қилинган.
Америкалик ҳуқуқ фаоллари ва қонунчилар Байден маъмуриятини ушбу афғонларни Тинч океанидаги АҚШга қарашли Гуам оролига жўнатишга чақирмоқда. The New York Times газетаси илгари ёзганидек, Афғонистон ҳудудидан эвакуация қилиш АҚШ визасини олиш учун берилган аризаларни кўриб чиқиш жараёнида имтиёз бермайди, шунингдек, агар аризалар рад этилса, бу одамлар ўз ватанига депортация қилинмаслигига ҳам кафолат бермайди.
Аввалроқ Bloomberg АҚШ президенти Жо Байден маъмурияти Қозоғистон, Тожикистон ва Ўзбекистондан ўз ҳудудларига АҚШ Қуролли кучлари билан ишлаган 9 мингга яқин афғонларни вақтинча жойлаштиришни сўрагани ҳақида хабар берган эди. Айни пайтда Қозоғистон АҚШдан афғонистонлик қочқинларни қабул қилиш бўйича мурожаат келиб тушмаганини билдирди.
Изоҳ (0)