“Uning ish haqi to‘lanadigan lavozimi bitta”. Sardor Umrzoqov o‘ndan ortiq lavozimga egaligi haqidagi xabarlarga munosabat bildirildi

So‘nggi vaqtlarda ijtimoiy tarmoqlarda va bir qator saytlarda bosh vazir o‘rinbosari — investitsiyalar va tashqi savdo vaziri Sardor Umrzoqov bir vaqtning o‘zida 10 dan ortiq lavozimni egallab turgani haqida xabarlar tarqalmoqda. Shu munosabat bilan bu masalaga aniqlik kiritildi.

Investitsiyalar va tashqi savdo vazirligining ma’lum qilishicha, u 2020-yil 10-martidan boshlab Prezident farmoniga muvofiq tayinlangan va ish haqi to‘lanadigan yagona egallab turgan lavozim O‘zbekiston bosh vazirining o‘rinbosari, investitsiyalar va tashqi savdo vaziri lavozimi hisoblanadi. Boshqa barcha tilga olingan lavozimlar alohida lavozimlar hisoblanmaydi hamda bajariladigan vazifalar doirasida qo‘shimcha majburiyat va funksiyalarni nazarda tutadi.

“Birinchidan, Tarif va notarif tartibga solish kengashi, JSTga a’zo bo‘lish bo‘yicha idoralararo komissiya va Tashqi savdo, investitsiyalar, mahalliy sanoatni rivojlantirish va texnik jihatdan tartibga solish masalalari bo‘yicha hukumat komissiyasi kabi kollegial organlarga rahbarlik qilish vazirlik vakolatiga kiradigan, biroq boshqa vazirliklar, idoralar, tarmoq birlashmalari, tijorat banklari hamda mahalliy hokimiyat organlarining ishtirokini talab qiladigan masalalarni hal qilishga imkon beradi.

Ikkinchidan, qonun hujjatlariga muvofiq, aksiyadorlik jamiyatlari va davlat kompaniyalarining Kuzatuv kengashlari kundalik operatsion faoliyatni boshqarish yoki unga rahbarlik qilish bilan shug‘ullanmaydigan va odatda aksiyadorlarning vakillaridan iborat kollegial organlardir. Shuning uchun, Sardor Umrzoqovning To‘g‘ridan to‘g‘ri investitsiyalar jamg‘armasi, ATB ‘O‘zagroeksportbank’, ‘O‘zbekinvest’ EISK AJ va boshqa shu kabi tashkilotlar Kuzatuv kengashlarining raisi darajasidagi ishtiroki ushbu idoralarning eng yirik aksiyadori bo‘lgan Hukumat vakili sifatida yilda bir necha marta o‘tkaziladigan uchrashuvlar davomida faoliyatining natijalari va strategik yo‘nalishlarini muhokama qilish bilan chegaralanadi.

Uchinchidan, ma’lumki, O‘zbekiston boshqa davlatlar qatorida Yevropa tiklanish va taraqqiyot banki, Osiyo taraqqiyot banki, Islom taraqqiyot banki va Osiyo infratuzilmaviy investitsiyalar banki kabi qator xalqaro moliya institutlari (XMI)ning asoschisi hisoblanadi. Strategik qarorlar qabul qilishda aksiyador mamlakatlarning manfaatlari ularning vakolatli vakillarining yilda bir marotaba o‘tkaziladigan Boshqaruvchilar kengashi majlislarida ishtirok etishi orqali himoya qilinadi. Yig‘ilishlar davomida, odatda, XMIning o‘tgan yildagi faoliyati yakunlari sarhisob qilinadi, shuningdek, keyingi faoliyat strategiyalari va rejalari muhokama etiladi. Amaldagi qonunchilikka muvofiq, O‘zbekiston Respublikasining XMI bilan barcha munosabatlarining keng ko‘lamini muvofiqlashtirish ITSV javobgarlik sohalariga kiradi. Bosh vazir o‘rinbosari Sardor Umrzoqov ITSV rahbari sifatida yuqorida qayd etilgan XMIlarning O‘zbekiston Respublikasi tomonidan boshqaruvchisidir”, — deyiladi xabarda.

Vazirlikning qo‘shimcha qilishicha, ko‘plab mamlakatlarda shakllangan amaliyotga ko‘ra, yuklatilgan vazifalarni eng samarali tarzda bajarish hamda u yoki bu masalalarni hal etish doirasida turli idoralarning samarali muvofiqlashtiruvini ta’minlash maqsadida hukumat a’zolari turli kollegial organlar va komissiyalar tarkibiga kiradi.