Andijon viloyatida COVID-19 bemorlarini davolashga mo‘ljallangan markazlarda koronavirusga chalingan hamda kasallikda gumon qilingan 1061 nafar bemor davolanmoqda. Bu haqda “Daryo” muxbiri Umidjon Mamarasulov xabar berdi.
Andijon viloyat sog‘liqni saqlash boshqarmasi axborot xizmati xodimi Mufazzalsho Muhammadiyevning ma’lum qilishicha, koronavirusga chalingan bemorlarni davolash uchun birinchi bosqichda to‘rtta — viloyat yuqumli kasalliklar shifoxonasi, Andijon shahar markaziy shifoxonasi, narkologiya dispanseri hamda qilichbozlik sport majmuasida jami 1180 o‘rinli kasallanganlarni saralash va taqsimlash markazi faoliyat yuritmoqda. Shuningdek, viloyat hokimligi tashabbusi bilan ikkinchi bosqich uchun yana beshta hududda 1500 ta zaxira o‘rin tayyorlab qo‘yilgan.“Viloyat shtabi tomonidan taqdim etilgan raqamlar tahlil qilinganda, shu kunlarda bir sutka davomida o‘rtacha tez tibbiy yordam xizmatiga jami 4500 ta chaqiruv bo‘lgan. Viloyat bo‘yicha 11 ta laboratoriyada bir kunda PZR apparatlari orqali o‘rtacha 4000 ga yaqin tahlillar o‘tkazilmoqda. Natijada kun davomida o‘rtacha 30—40 nafar fuqaroda musbat natijalar aniqlanmoqda. Ularning klinik belgilariga qarab shifoxonada yoki uy sharoitida davolanishi tavsiya etilmoqda. Bugungi kunda — 2021-yilning 14-iyul holatiga ko‘ra, davolash markazlarida 1061 nafar bemor davolanmoqda. Shundan 36 nafarini homilador ayollar, 82 nafarini esa 18 yoshgacha bo‘lgan bolalar tashkil etadi”, — deydi Mufazzalsho Muhammadiyev.
Qo‘shimcha qilinishicha, viloyat hokimligi tomonidan koronavirus infeksiyasi bilan kasallangan bemorlarga sifatli tibbiy xizmat tashkil etish maqsadida tibbiyot muassasalarida 49 turdagi 3 milliard so‘mlik hamda “Makro-farm” MChJ omborxonasida 24 milliard so‘mlik faqat COVID’ni davolashga ishlatiladigan dori-darmon va tibbiy jihozlar zaxirasi yaratilgan.
Izoh (0)