Сўнгги вақтларда ижтимоий тармоқларда ва бир қатор сайтларда бош вазир ўринбосари — инвестициялар ва ташқи савдо вазири Сардор Умрзоқов бир вақтнинг ўзида 10 дан ортиқ лавозимни эгаллаб тургани ҳақида хабарлар тарқалмоқда. Шу муносабат билан бу масалага аниқлик киритилди.
Инвестициялар ва ташқи савдо вазирлигининг маълум қилишича, у 2020 йил 10 мартидан бошлаб Президент фармонига мувофиқ тайинланган ва иш ҳақи тўланадиган ягона эгаллаб турган лавозим Ўзбекистон бош вазирининг ўринбосари, инвестициялар ва ташқи савдо вазири лавозими ҳисобланади. Бошқа барча тилга олинган лавозимлар алоҳида лавозимлар ҳисобланмайди ҳамда бажариладиган вазифалар доирасида қўшимча мажбурият ва функцияларни назарда тутади.
«Биринчидан, Тариф ва нотариф тартибга солиш кенгаши, ЖСТга аъзо бўлиш бўйича идоралараро комиссия ва Ташқи савдо, инвестициялар, маҳаллий саноатни ривожлантириш ва техник жиҳатдан тартибга солиш масалалари бўйича ҳукумат комиссияси каби коллегиал органларга раҳбарлик қилиш вазирлик ваколатига кирадиган, бироқ бошқа вазирликлар, идоралар, тармоқ бирлашмалари, тижорат банклари ҳамда маҳаллий ҳокимият органларининг иштирокини талаб қиладиган масалаларни ҳал қилишга имкон беради.
Иккинчидан, қонун ҳужжатларига мувофиқ, акциядорлик жамиятлари ва давлат компанияларининг Кузатув кенгашлари кундалик операцион фаолиятни бошқариш ёки унга раҳбарлик қилиш билан шуғулланмайдиган ва одатда акциядорларнинг вакилларидан иборат коллегиал органлардир. Шунинг учун, Сардор Умрзоқовнинг Тўғридан-тўғри инвестициялар жамғармаси, АТБ ‘Ўзагроэкспортбанк’, ‘Ўзбекинвест’ ЭИСК АЖ ва бошқа шу каби ташкилотлар Кузатув кенгашларининг раиси даражасидаги иштироки ушбу идораларнинг энг йирик акциядори бўлган Ҳукумат вакили сифатида йилда бир неча марта ўтказиладиган учрашувлар давомида фаолиятининг натижалари ва стратегик йўналишларини муҳокама қилиш билан чегараланади.
Учинчидан, маълумки, Ўзбекистон бошқа давлатлар қаторида Европа тикланиш ва тараққиёт банки, Осиё тараққиёт банки, Ислом тараққиёт банки ва Осиё инфратузилмавий инвестициялар банки каби қатор халқаро молия институтлари (ХМИ)нинг асосчиси ҳисобланади. Стратегик қарорлар қабул қилишда акциядор мамлакатларнинг манфаатлари уларнинг ваколатли вакилларининг йилда бир маротаба ўтказиладиган Бошқарувчилар кенгаши мажлисларида иштирок этиши орқали ҳимоя қилинади. Йиғилишлар давомида, одатда, ХМИнинг ўтган йилдаги фаолияти якунлари сарҳисоб қилинади, шунингдек, кейинги фаолият стратегиялари ва режалари муҳокама этилади. Амалдаги қонунчиликка мувофиқ, Ўзбекистон Республикасининг ХМИ билан барча муносабатларининг кенг кўламини мувофиқлаштириш ИТСВ жавобгарлик соҳаларига киради. Бош вазир ўринбосари Сардор Умрзоқов ИТСВ раҳбари сифатида юқорида қайд этилган ХМИларнинг Ўзбекистон Республикаси томонидан бошқарувчисидир», — дейилади хабарда.
Вазирликнинг қўшимча қилишича, кўплаб мамлакатларда шаклланган амалиётга кўра, юклатилган вазифаларни энг самарали тарзда бажариш ҳамда у ёки бу масалаларни ҳал этиш доирасида турли идораларнинг самарали мувофиқлаштирувини таъминлаш мақсадида ҳукумат аъзолари турли коллегиал органлар ва комиссиялар таркибига киради.
Мавзуга доир:
Изоҳ (0)