“Tolibon” harakati Tojikiston fuqarolari uchun viza rejimini bekor qildi, bu, xususan, Sherxon Bandar savdo-bojxona punktida yuk mashinalari haydovchilariga nisbatan tatbiq qilingan, deya xabar bergan Asia-Plus.
Xabarga ko‘ra, Tojikistonga o‘tgan haydovchilardan biri bu haqda Asia-Plus nashriga ma’lum qilgan.
Haydovchining aytishicha, Sherxon Bandardagi chegara ochiq va “Tolibon” harakati vakillari transportlarning harakatlanishi uchun muammo tug‘dirmayapti.
“Tolibon” biz uchun viza rejimini bekor qildi. Avval Afg‘onistondan qaytishda, taxminan, 200 AQSh dollari miqdorida pora berishimizga to‘g‘ri kelgandi. Bundan tashqari Sherxon Badardan o‘tishda 1000 somoni xarajat qilardik. Endi bunday emas. Hozir yukni o‘tkazish uchun 60 somoni pul to‘layapmiz”, — degan haydovchi.
“Tolibon” Tojikistondagi Afg‘oniston elchixonasi tojikistonlik haydovchilarga viza berishni to‘xtatganidan keyin mazkur rejimni bekor qildi.
Afg‘onistonning Dushanbe shahrida joylashgan elchixonasidagi manba Asia-Plus nashriga vizalarning qancha vaqt davomida berilmasligi bo‘yicha izoh bermagan.
“Tolibon” vizalarning bekor bo‘lgani bo‘yicha rasmiy axborot tarqatmagan, biroq harakat a’zolari ijtimoiy tarmoqlarda chegaradagi o‘tkazish punktlari ishlayotgani haqida videoroliklarni ulashgan va mamlakatdan chiqishda muammolar yo‘qligini bildirgan.
Tojikiston rasmiylari ham Sherxon Bandar bojxona punktining ochilganiga rasmiy izoh bermagan.
Ammo Asia-Plus nashriga ma’lumot bergan haydovchi bojxona nazoratidan u yerni “Tolibon” vakillari egallab olganidan keyin, ya’ni o‘n kuncha avval o‘tganligini aytgan. Haydovchining so‘zlariga ko‘ra, u Afg‘oniston hududi orqali mamlakatga shakar olib kirgan.
“Biz odatda u yerdan mevalar, sabzavotlar, ayniqsa, sabzi va shakar olib o‘tardik. Biroq hozir omborxonalar bo‘shab qolgan. Shuningdek, avval Afg‘oniston hukumatiga tegishli bo‘lgan hududlar, jumladan, Sherxon Bandar orqali ham mahsulotlar olib o‘tish taqiqlandi. Shunga qaramay, Afg‘onistonga o‘tish muammoli masala emas va bizga Qunduz, Balx va Kobul shaharlariga borishimizda hech qanday to‘siqlar yo‘q”, — degan nashr manbasi.
Qunduz viloyatidagi “Pajxvok” agentligi muxbiri Ajmal Kokar ham tojikistonliklarning Afg‘oniston hududiga kirib-chiqishida muammolar yo‘qligini ta’kidlagan.
Eslatib o‘tamiz, 22-iyunda “Tolibon” a’zolari Sherxon-Bandar blokpostini egallagan va 100 dan ortiq afg‘on askarlari hamda fuqarolar Tojikistonga qochib o‘tgan. Ayni vaqtda mazkur o‘tish yo‘li hanuzgacha “Tolibon” nazorati ostida bo‘lib turibdi.
Avval Tojikiston Afg‘onistondagi siyosiy vaziyatga qaramay, mamlakatga elektr energiyasi yetkazib berishda davom etayotgani, Afg‘onistondan g‘arb qo‘shinlari olib chiqilgach, Yevroittifoq mamlakatni barqarorlashtirishda yordam taklif qilmoqchiligi, Turkmaniston “Tolibon” bilan yashirincha muzokaralar o‘tkazgani, “Tolibon” Tojikiston bilan chegarada o‘z bayrog‘ini o‘rnatgani haqida xabarlar berilgandi.
Izoh (0)