O‘zbekistonda korxona va tashkilotlar xodimlari COVID-19 qarshi ommaviy, lekin ixtiyoriy emlanmoqda. Emlanayotganlar orasida mashhurlar ham bor

O‘zbekiston Madaniyat vazirligi markaziy apparati hamda barcha tizim tashkilotlari rahbar-xodimlari 9-iyul kuni ixtiyoriy ravishda koronavirusga qarshi emlandi, deb xabar bermoqda vazirlik matbuot xizmati. Avvalroq vazirlik rahbari Ozodbek Nazarbekov Xalqaro press-klubning jonli efirida koronavirusga qarshi vaksina bilan emlangan edi.

Madaniyat vazirligida emlanganlar orasida Mahmud Namozov, Ravshan Komilov, Ilhom Farmonov, Abduvali Rajabov kabi xonandalar, taniqli teleboshlovchi Ahror Qo‘shmatov ham bor.

“Sevimli” telekanalining “Zamon” informatsion dasturi boshlovchisi Manija Bahriyeva ham jonli efir vaqtida vaksina qabul qilgan va o‘z ish faoliyatini studiyada davom ettirgan.

“Barcha hamkasblarimga tavsiya qilgan holda COVID-19’ga qarshi emlanish uchun keldim. Koronavirusga qarshi kurashda o‘zimni, yaqinlarimni va farzandlarimni himoya qilaman degan umiddaman”, — deydi boshlovchi.

Bundan tashqari, Jizzax viloyati IIB YHXB shaxsiy tarkibi ko‘ngilli tarzda koronavirusga qarshi emlangan. “Ko‘chada fuqarolar bilan muloqot qilish jarayonida kasallikning tarqalishining oldini olishda emlash eng samarali vositadir”, — deyiladi xabarda.

Shuningdek, O‘zbekistondagi eng yirik supermarket tarmoqlaridan biri — “Korzinka.uz” ham o‘z xodimlarini koronavirusga qarshi o‘zbek-xitoy vaksinasi bilan emlatmoqda.

Sog‘liqni saqlash vazirligi 26-iyun kuni “Men vaksina oldim” aksiyasini boshlagan edi. Aksiya doirasida vazirlik matbuot xizmati deyarli har kuni vaksina olgan yuqori martabali o‘zbekistonliklar haqida axborot berib kelmoqda. Ular orasida katta tibbiyot muassasalarining rahbarlaridan tortib, viloyat hokimi-yu vazirlargacha bor.

Hozirgacha emlangan yuqori martabali amaldorlar orasida Senat raisi Tanzila Norboyeva (“Sputnik V”), mahalla va oilani qo‘llab-quvvatlash vaziri Rahmat Mamatov (“Sputnik V”), madaniyat vaziri Ozodbek Nazarbekov (“Sputnik V”), maktabgacha ta’lim vaziri Agrippina Shin (“Sputnik V”), Namangan viloyati hokimi Shavkat Abdurazzoqov (“Sputnik V”), xalq ta’limi vaziri Sherzod Shermatov (ZF-UZ-VAC 2001 o‘zbek-xitoy vaksinasi) kabilarni uchratish mumkin.

O‘zbekistonda 10-iyul holatiga ko‘ra 4 857 947 doza vaksinadan foydalanilgan bo‘lib, 902 mingdan ortiq kishi koronavirusga qarshi to‘liq emlangan.