Ўзбекистонда корхона ва ташкилотлар ходимлари COVID-19 қарши оммавий, лекин ихтиёрий эмланмоқда. Эмланаётганлар орасида машҳурлар ҳам бор

Ўзбекистон Маданият вазирлиги марказий аппарати ҳамда барча тизим ташкилотлари раҳбар-ходимлари 9 июль куни ихтиёрий равишда коронавирусга қарши эмланди, деб хабар бермоқда вазирлик матбуот хизмати. Аввалроқ вазирлик раҳбари Озодбек Назарбеков Халқаро пресс-клубнинг жонли эфирида коронавирусга қарши вакцина билан эмланган эди.

Маданият вазирлигида эмланганлар орасида Маҳмуд Намозов, Равшан Комилов, Илҳом Фармонов, Абдували Ражабов каби хонандалар, таниқли телебошловчи Аҳрор Қўшматов ҳам бор.

«Севимли» телеканалининг «Замон» информацион дастури бошловчиси Манижа Баҳриева ҳам жонли эфир вақтида вакцина қабул қилган ва ўз иш фаолиятини студияда давом эттирган.

«Барча ҳамкасбларимга тавсия қилган ҳолда COVID-19’га қарши эмланиш учун келдим. Коронавирусга қарши курашда ўзимни, яқинларимни ва фарзандларимни ҳимоя қиламан деган умиддаман», — дейди бошловчи.

Бундан ташқари, Жиззах вилояти ИИБ ЙҲХБ шахсий таркиби кўнгилли тарзда коронавирусга қарши эмланган. «Кўчада фуқаролар билан мулоқот қилиш жараёнида касалликнинг тарқалишининг олдини олишда эмлаш энг самарали воситадир», — дейилади хабарда.

Шунингдек, Ўзбекистондаги энг йирик супермаркет тармоқларидан бири — «Korzinka.uz» ҳам ўз ходимларини коронавирусга қарши ўзбек-хитой вакцинаси билан эмлатмоқда.

Соғлиқни сақлаш вазирлиги 26 июнь куни «Мен вакцина олдим» акциясини бошлаган эди. Акция доирасида вазирлик матбуот хизмати деярли ҳар куни вакцина олган юқори мартабали ўзбекистонликлар ҳақида ахборот бериб келмоқда. Улар орасида катта тиббиёт муассасаларининг раҳбарларидан тортиб, вилоят ҳокими-ю вазирларгача бор.

Ҳозиргача эмланган юқори мартабали амалдорлар орасида Сенат раиси Танзила Норбоева («Спутник V»), маҳалла ва оилани қўллаб-қувватлаш вазири Раҳмат Маматов («Спутник V»), маданият вазири Озодбек Назарбеков («Спутник V»), мактабгача таълим вазири Агриппина Шин («Спутник V»), Наманган вилояти ҳокими Шавкат Абдураззоқов («Спутник V»), халқ таълими вазири Шерзод Шерматов (ZF-UZ-VAC 2001 ўзбек-хитой вакцинаси) кабиларни учратиш мумкин.

Ўзбекистонда 10 июль ҳолатига кўра 4 857 947 доза вакцинадан фойдаланилган бўлиб, 902 мингдан ортиқ киши коронавирусга қарши тўлиқ эмланган.